Congress vote turin Mizoram mipui sáwm

All India Congress Committee (AICC) hruaitute zinga Mizoram changtu Bhakta Charan Das chuan, Mizoramah Congress party hmalaknaa Mizoram Secular Alliance (MSA) din a ni chu lawmawm a tih thu sawiin, Mizoram inthlanpuiah Congress party leh an thawhpuite vote tling turin Mizoram mipui a sáwm.

Bhakta Charan Das leh AICC hruaitu dang - observer for Mizoram Sachin Rao, Media & Publicity chairman Shri Pawan Khera, Social Media chairperson Supriya Srinet, thupuangtu Mathew Antony leh Dr Summit Dubey ten nimin khan Aizawl an rawn thleng a; Mizoram inthlanpui awm turah media leh communication lamah inbuatsaihna ṭha zawk a awm theih nan hma an la dawn a ni.

Bhakta Charan Das chuan, kum 2024-a Lok Sabha inthlanpuiah BJP sorkar paihthla tura I.N.D.I.A din chhan chu India rama sakhaw zalenna duh vang a nih thu a sawi a, "BJP-te'n India ram hmun hrang hrangah Hindu lal ram a pian nan hma an la mek a, Mizoram pawh tuar mai thei zinga mi a ni. BJP sorkar hi sakhaw tênau zawkte tan a him lo. Mizoram mipuite'n ngaihtuahna thar in hman a, MLA General Election 2023-ah Congress party in thlan tlin ngei a ngai a ni," a ti.