Rùnin kan awm mek - MPCC Treasurer

Mizoram Pradesh Congress Committee (MPCC) treasurer Dr Lalmalsawma Nghaka chuan, Mizo ram leh hnam rùna a awm mek thu leh ṭhalaite beidawnnaah an tlûk luh mek thu a sawi.

Dr Lalmalsawma Nghaka hian nimin khan Aizawl South-II Congress pary political session-ah thu sawiin, "Kan sakhua beihin a awm mek a, kan ṭhalaite ruihhlo leh beidawnnaah an lut mek a ni. Kan ram, kan hnam rùnin kan awm mek a, harsatna ril takin kan ram a nuai mek a ni," a ti.

Mizo ṭhalaite sorkar hnain a daih lo tih sawiin Dr Lalmalsawma chuan, "Sorkar hna ruak post 50 pawh ṭhalai sing dawn velin an inchuh zel. Ṭhalaite beidawnnaah an tlu lut mek a, chuta ṭanga chhan chuak turin Congress party chuan sorkar ṭha leh ṭang puihna policy kan auchhuahpui chhan a ni," a ti a; ṭhalaite mahni kea an din theiha hma an sâwn a, eizawnna tlinga khai chhuah an nih theih nan ṭang puihna an kalpui dawn thu a sawi.

MPCC Treasurer chuan, "Kan ramah eirûknain zung thûk tak a kai mek. Mi rethei leh harsa zawkte rahbehin an awm mek a, pawisak nei lo, mi hausa rual lalna ramah kan ram a chhuak mek a ni," a ti a; Mizoram tana sorkar ṭha siam tura thawhpuiah mipui a sáwm a ni.