Hri danna pek chungchang sawiho

Mamit District Task Force on Immunization chu nimin khan bawrhsap VL Remliana kaihhruaiin DC conference hall-ah an ṭhukhawm a; Intensified Mission Indradhanush (IMI) 5.0 thawh khatna August 7-12, 2023 chhunga neihah fûr lai a nih avangin kawng chhia leh ruahsur vanga kal pawh hleih theih loh khaw ṭhenkhat a awm thu tarlan a ni.

Ṭhutkhawma tarlan danin, IMI 5.0 thawh khatnaah hian hri danna (vaccine) pek tura ruahman naupang kum hnih hnuai lam mi 166 zinga 165 hnenah pek a ni a; naupang kum 1-5 inkarah hri danna la la ngai lo mi 106 hnenah damdawi pek a ni. Nu nau pai mi 50 pek tum zinga 46 pek a ni bawk.

IMI 5.0 thawh hnihna hi September 11-16, 2023 chhungin Mamit district-a khaw 92-ah kalpui tura ruahman a ni a, khua 92-ah zirchianna kalpui mek niin, khaw 12-ah zawh tawh a ni.

Mamit district chu inkalpawhna kawng chhia leh hnam chi hrang hrang chenna a nih avangin hun kal tawha harsatna awm ṭhin angahte buaina awm lo tura hmalak a rêl a; Bru leh Chakma khua bikah khawtlang hruaitute nen inbiak lâwkna neih ni se, an ti.

Aizawl SMO Dr Lalhlimpuii tarlan danin, Mizoramah a thlawna hri danna dawn theih chi 11 a awm a; kum 2022-23 chhungin Mamit district-ah mi 1,485-in an dawng. Mamit district-a khaw 31 chu high risk area a la ni.