AR-in chhuah loh chhan an dap; MoU draft-ah thil harsa a awm - HM

Home Minister Lalchamliana chuan, Assam Rifles-in Aizawl khawpui laili aṭanga Zokhawsanga insawn chhuah loh dan an dap thu leh, an chhuah theihna tura inremna thuthlung, memorandum of understanding (MoU) an duanah pawh thil harsa a la awm thu a sawi.

HM Lalchamliana hian nimin khan ZPM member Dr Vanlalthlana zawhna chhángin, Aizawl khawpui laili aṭanga AR insawn chhuahna tura harsatna awmte House-ah a sawi chhuak a; "AR-te hi Aizawl khawpuiah hian an awm rei tawh a, keini zawng zawng awm hma hian an lo awm daih tawh. Chhuah hi an hreh em em mai a ni," a ti.

Lalchamliana chuan, "Chhuah hreh em em, an hotu ber Amit Shah meuh pawh rawn kalin, ràlkhat aṭangin lungphûm a phûm a, thutiam titih deuh siam lehnghalin an chhuak ang, a ti a. MoU an draft-ahte pawh hian thil harsa eng emaw, khel fé ngaite an la rawn telh duh zel," a ti a; NGO-te nen a remchan dan anga aw ring zawk neih a ṭhat a rin thu a sawi.

Home Minister chuan, AR hoin harsatna an sawi pakhat chu, power line chungchang a nih thu sawiin, "Power line an pawhna saw Mualpui aṭangin a ni a, Mualpuiah metre dah tur a ni. Chu chu Power & Electricity leh JERC thutlukna a ni," a ti a; AR hoin an compound chhungah dah ngei an duh thu sawiin, "Chhuah theih loh dan zawng zawng hi an dap a ni ti ila a sual àwm lo e," a ti.

AR hoin Lammual thlanga ram neite engtin nge in tih ang, tih thlengin official-a an zawh thu sawiin Lalchamliana chuan, "Keini ngaihdan chuan, an chhuahsan tawh berte chuan an chhuahsan hmun chu a remchan dan angin kan lo enkawl ve mai ang chu, anni lo worry (lungkham) tur a ni hleinem tih te, khatiang khan kan bei a ni," a ti a; AR an insawn chhuah theih theihpatawp chhuahin hma an la tih a sawi.

MNF member L Thangmawia'n, Union Home minister Amit Shah-a'n a sawi anga thla hnih chhunga AR an chhuah loh chhan chungchangah chhànna dawn a nih tawh leh ni loh a zawhna chhángin Home Minister chuan, "Keini chuan eng mah kan la dawng lo," a ti.

Lalchamliana chuan, Amit Shah a lo kal hnuah hmalakna a chak phah tih sawiin, "MoU an buatsaih ta a, chu chu kan official-te'n uluk takin an examine a, tunah hian thu inṭhial lai mek a ni," a ti a; Chief Minister-in Union Home Minister a lo sawipui tur thu a sawi angin, remchang hmasa berah a sawipui an beisei thu a sawi.

Congress Legislature Party leader Zodintluanga zawhna, Lunglei Municipal Council inthlan dawna Revenue Minister-in AR-te insawn chhuah thu a sawi chungchang sawifiahin Chama chuan, "AR motor kha chu a tlân a ni, an ding lo a, an motor kha chu Zokhawsang lamah chuan an tlân ngei a, an zavai chuan an lo chhuak lo ni àwm tak a ni," a ti.

Home Minister chuan, AR-te chu Mizo mipui tam berin khawpui laili aṭangin chhuak se an duh thu sawiin, "Chhuak lo se ti an awm ve tih tun hnaia ka lo hria a, a mak ka ti khawp mai," a ti bawk.