Rêl kawng lei chima thi leh hliamte sorkar laipuiin ṭanpuina a pe dawn

Railways minister Ashwini Vaishnaw chuan, nimina Sairang bula rél kawng tur lei dawh mek chima thi ta chhungte hnenah Railways-in zang-nadawmna Rs 10,00,000 zel a pek dawn thu a puang. Prime minister Narendra Modi pawhin PM National Relief Fund (PMNRF) aṭangin Rs 2,00,000 ṭheuh pek a nih dawn thu a puang bawk.

Rél kawng siam meka chhiatna thleng chungchang hi President Droupadi Murmu, prime minister Narendra Modi, Union Home minister Amit Shah, Railways minister Ashwini Vaishnaw, Mizoram Governor leh Chief Minister bakah, ram hruaitu dangte'n X-ah an tarlang. Chhiatna thleng chu pawi an tih thu leh mitthi chhungte an tawrhpui thu tarlangin, hliamte an ṭhat chhuah leh thuai theih nan duhsakna an hlan a ni.

Railways Minister-in X-a a tarlan danin, sorkar laipuiin mitthi chhungte hnenah zangnadawmna Rs 10,00,000 zel a pe dawn a, hliam na zualte hnenah Rs 2,00,000 leh hliam na lote hnenah Rs 50,000 a pe dawn. Prime Minister pawhin PMNRF aṭangin mitthi chhungte hnenah Rs 2,00,000 zel leh hliamte hnenah Rs 50,000 zel pek a ni tur thu a puang bawk.

President Droupadi Murmu chuan, Mizorama chhiatna thlengin a tihlungngaih thu a tarlang a, "Mitthi chhungte ka tawrhpui tak zet a, hliamte an dam leh thuai theih nan ka ṭawngṭai a ni," a ti.

PM Narendra Modi chuan, lei siam mek chimin a rilru a tihnat thu tarlangin, "An hmangaihte chántu zawng zawng kan tawrhpui tak zet a ni," a ti a, hliamte dam ṭha leh thuai turin duhsakna a hlan.

Home minister Amit Shah chuan, lei chim vanga chhiatna thlengin a ṭhàwn thu leh, mitthi chhungte a tawrhpui a, hliamte an dam thuai a duhsak thu a tarlang a; Mizoram Governor leh CM-te a be nghal a, a ṭul anga puih a inhuam thu a hrilh thu a tarlang bawk.

Governor Dr Hari Babu Kambhampati chuan, "Aizawl aṭanga km. 20 vela hlá Kurunglui chunga rél kawng siamna hmuna chêtsualna rapthlak tak thleng hian min ṭháwng tak zet a. Tun hunah hian heng mi zahawm tak tak, an hnathawhna hmuna thi tate'n kan rilru a luahkhat a, an chhungte kan ṭawngṭaipui a ni," a ti.

Chief minister Zoramthanga chuan, chhiatna thlengin a ṭhàwng thu tarlangin, "He chhiatna thleng vanga nunna chán an awm hi a pawi ka ti tak zet a, nunna chánte leh an chhungte ka tawrhpui em em a ni. Hliam tuarte pawh chhan chhuah an nih a, an dam leh thuai theih nan duhsakna sang ber ka hlan nghal," a ti a, chhan chhuah hna thawk tura chhuakte chungah a lawm thu a tarlang bawk.