Duhoma'n leilet neitute harsatna a sawi; Sorkarin a en zui ang - CM Zoramthanga

Serchhip bialtu MLA Lalduhoma chuan National Highways & Infrastructure Development Corporation Ltd. (NHDCIL)-in NH-54 laihna leivûng an paih duhdah vanga Mat lui kama leilet neitute harsatnate nimin khan House-ah a sawi chhuak. PWD enkawltu chief minister Zoramthanga chuan, sorkarin a en zui tur thu a sawi.

Lalduhoma chuan, Serchhip leh Keiṭum inkar kawng laihnaah leivûng paihna (soil bank) siam ni ni mah se, a dâwlna an uluk lo tih sawiin, "En mai pawhin leivûng a dàwl dawn lo tih hriat sa a ni. Fûr a lo thleng a, sabereka khuangkaih siamtu a ni. Mat kamah Zawlpui zauin a tuar nasa. Ruah a sûrin leivûng a hnâwl a, sabereka khuangkaih insiamin, tui lâkna kawng hnawh a, a rem remah a luang. Tui lâkna atana lui khuah lian ber pawh a hnawh khat a ni," a ti.

Leilet neitute tui lâkna aṭangin lung leh lei nâwi hlir a kal thu sawiin Serchhip Bialtu MLA chuan, "Tui fîm hmuh tur a awm lo. Sangha dil siam theih lohin a awm a, bun phun theih loin ram a tichhia. Buh phun sa pawh eng emaw zat a tichhia. Tuikhuah leh tui kawng JCB hmangte'n an hai fai a, ruah a sûr a, a hnawh leh zel a, vên sên a ni lo," a ti a; tui lâkna kawng a chhiat zel chuan chhungkaw 100 télin an tawrh theih thu a sawi.

Lalduhoma chuan, sorkar leh minister aṭanga thlamuanna dawn an beisei laiin an dawng lo tih sawiin, "Sorkarin CM kaihhruaina hnuaiah Road Infrastructure Board a din a, project lian endiktu tura din a ni. Vawi khat tal anni hian min rawn enpui se kan duh. Kumin chauh a ni lo, kum dangah pawh harsatna thleng zel dawn," a ti.

Hmasawnna a awm dawn chuan a man pek tur a awm tih chu tlang hriat a nih thu sawiin Duhoma chuan, "Mahse, heti em em lo deuh hian a tihziaawm dan a awm. Company-te kan sapatàltir reng chuan kan la tuar dawn chauh. Mipuite min zah lo em em a ni," a ti a; sorkarah beiseina an neih avang leh anmahni chhan theitu awm chhun chu sorkar a nih avangin hma la turin sorkar a ngen.

Lalduhoma thusawi chungchangah CM Zoramthanga chuan, hmasawnna duh chuan man pek a ngai tih chu dik mahse phal chin pek a ngai tih a sawi a, "Leilet tichhe vek a, tuikawng tichhiatte hi a pawi zual. Engtin nge kan tihtawp ang, sorkarin kan lo en ang. Compensation záwng nge, chhawmdawl emaw, siamṭhat dan ngaihtuah a ngai. Central sorkarah thlen ngaiin ka hria, sorkarin hma kan lo la ang," a ti.

Chief Minister chuan, zangnadawmna pek chungchang leh a tihtawp chungchangah pawh sorkarin hma an lak tur thu House a hrilh.

Agriculture minister C Lalrinsanga chuan, leilet neitute'n harsatna an tâwk chu pawi a tih thu sawiin, "Juy 5, 2023 khan a hmunah kan enfiah a, hmalak dan tur loneitute nen kan sawiho. NH-54 laih vanga leilet a tihchhiatte pawh a neitute nen enho a ni a, loneitute harsatna sukiang turin theihtawp kan chhuah," a ti.

Agriculture Minister sawi danin, department chuan leivûng thenfaina atan zau hruaitute hnenah Rs 1,00,000 an pe a, chhawmdawlna pek dan turte dap an a ni.