KHAWTHLIR

MLC-in thisen pe

Mizoram Law College NSS leh Red Ribbon Club chuan nimin khan an college kum 40 tlin, ruby jubilee pualin Aizawl Civil Hospital Blood Centre-ah thisen an pe a, mipa 32 leh hmeichhia pariatte'n thisen unit 40 pe. Thisen pek zawhah Legal Aid Cell leh Pro Bono Club ruahmannain Aizawl bazar leh a chhehvelah Legal Outreach hun an hmang a, mipui veivak zingah dan leh hrai thuziak chi hrang hrang an sem a ni.

Khualzin 2,22,008

Tourism minister Robert Romawia Royte chuan nimin khan Assembly session-ah MNF member Lawmawma Tochhawng zawhna chhangin, sorkar kum liam ta 2022-23 chhungin khualzin 2,22,008-in Mizoram an rawn tlawh niin a sawi a, "Hun kal tawhah hetiang zat hian Mizoram an la tlawh ngai lo," a ti.

Sum thawh tipung

Aizawl additional DC Isaac C Lalrempuia hoa Aizawl DC pisaa Aizawl District Working Committee on National Foundation for Teacher’s Welfare ṭhukhawm chuan, NFTW fund atana zirtirtu zawng zawngin pawisa an thawh ṭhin Rs 200-ah tihpun state level committee-in an rêl tawh chu ṭha an ti. Teachers’ Day 2023 chu sikul tinin an remchan dan anga an sikula an hman turin an rél a bawk.

Meri Maati Mera Desh

India-in zalenna a hmuh champha vawi 75-na lawmna kal zela sorkar laipuiin Meri Maati Mera Desh campaign a buatsaih chu Mizoram pum huapin naktuk Zirtawpni chawhnu dar 2 hian hman a ni dawn. Meri Maati Mera Desh hmannaah hian India zalenna atana beitu mi huaisente hriatrengna lungphûm pahnih MINECO-ah phùm a ni dawn a, tualṭo thing ṭiak 75 phun tura ruahman a nih bakah, police, an duty-naa thite chawimawina hun hman a ni ang.

Naupang thiin hmu

Lalremruata (11), s/o Lalvulmawii, Mamit High School Veng chu nimin khan thiin hmuh a ni. Thu dawn danin, Lalremruata hi August 18, 2023 zinga an in aṭanga a chhuak chu a awmna chin hriat lohin a bo zui a, police-te leh mi tlawm-ngaite'n a remchan ang angin an zawng a, nimin chhun dar 12 vel khan Mamit khawthlang lam kawng hlui bulah naupang thi hmuh niin, Lalremruata ni ngeia hriat a ni.