Mizoram-Assam police-te inkah hnua Mizoram zîm/zau zawk chhàn a rem lo

Home minister Lalchamliana chuan MNF member Dr Vanlalṭanpuia zawhna chhangin, Mizoram police-te leh Assam police-te July 26, 2021-a an inkah hnua Mizoram a zìm zawk dan emaw, a zauh zawk dan emaw chu chhàn a rem loh thu House a hrilh.

Dr Vanlalṭanpuia chuan, Mizoram police leh Assam police inkah hnuah Mizoram luah chin a zim zawk nge, a zau zawk tih a zawt a; Lalchamliana chuan, "Inbiakna kal lai mek a nih avang leh inter-state security nghawng thei thil a nih avangin chhàn a rem lo," a ti.

Home Minister chuan, inkahna a thlen hnuah Mizoram-Assam ramri leh a chhehvelah Mizoram police eng emaw zat dah an nih thu sawiin, "Permanent battalion BOP (border outpost) leh temporary duty post hmun tam takah dah a ni," a ti a; BOP leh duty post-te panna kawngte pawh a remchan dan anga laih/siam a nih thu a sawi.

POLICE INKAH HNUAH MEETING NEIH DAN

■ High-level delegation meeting (state pahnih minister-te kaihhruaina hnuaiah) ṭum thum neih a ni.

■ Minister level video conference meeting ṭum thum neih a ni.

■ Mizoram-Assam ramri buai chungchanga hmalak zel dan tur ngaihtuahtu tur, Mizorama political party leh páwl hrang hrang aiawhte telna Boundary Committee din a ni a, ṭum nga an ṭhukhawm tawh.

■ Boundary Committee ṭhutkhawm tum nganain a rêl angin Study Group Notification din a ni.

■ High level delegation meeting tum ṭhumnain joint statement a tihchhuah point no. 1 bawhzuiin, Home department-in lehkha hmangin February 13, 2023 khan Assam sorkar hnenah Mizoramin ram a hauh chin leh ram a hauh chin huam chhunga khua leh mihring chungchang thil hrang hrang sawi fiahna a thehlut tawh.

■ DC level meeting/programme ṭum thum neih tawh a ni.