Dan anga hrem ngei phut

Tunhnaia naupang insawisa lai social media lama darha sawisak tawk hmeichhe naupang chhungte chuan nimin khan Serchhip Press Club-ah thuthar thehdarhtute kawmin, an fanu sawisatu dan anga hrem ngei an phut thu an sawi.

Naupang chhungte chuan rorelna dik an hmuh theih nan hmalak zel an tum thu sawiin, "Hemi kawngah hian Mizoram mipui leh NGO hrang hrangte min ṭawiawmna kan ngen a, rilru lam thlenga harsatna pawh a awm theih avangin khawngaih taka Mizoram mipuiten min ṭawngṭaipui zui zel turin keini chhungkua chuan kan ngenin kan sawm tak meuh meuh che u a ni," an ti.

Anmahni lainatu leh ṭawngṭaisaktu zawng zawngte chungah naupang chhungte chuan lawmthu sawiin, Child Welfare Committee, Serchhip Police leh Sub. Hqrs. MHIP, Sechhipte chungah lawmthu an sawi bawk.

An thusawi dangte :

# He thil thleng hi naupang engmah hre lo thil tih satliah mai mai angin lang mah se, sualna thuk takah kan ngai. Dan in hremna pe ngei se tih hi kan duhdan a ni.

# Kan chenna veng aṭanga hmun fianrial km. khat dawn laia hlaa hruai fal a, nikhaw hre loa siam ni a, darkar 3 lai mai diriam taka an sawisa kha na kan ti a, a rulh let nan engmah man kan ti lo.

# Kan fanu hi a fel lo tih kan hria, mahse heti taka sawisak a nikhaw hre lo em em a insiam nan chuan thu tling kan hmu lo a, kan na takzet a ni.

# He thil thleng hian Mizo mipui rilru a tinaa, a titu hi kum tling lo a ni tih pawh kan hria a, dan anga hremna pek ngei hi kan duh a, kan phut tlat a ni.

# Hetiang em em a nunrawnna thil tih hi, tun hnuah tu chungah mah a thlen tawh loh nan leh a sim ngei theih nan kutthlaktu chungah hian rorelna dik tak hlen chhuah ngei ni rawh se.