Aizawlah Microsite Project hawn a ni

Ayushman Bharat Digital Mission (ABDM), Mizoram chuan nimin khan Aijal Club-ah Microsite Project an hawng. Hawnna inkhawm hi ABDM state mission director Dr Eric Zomawia'n a kaihruai a, Health additional secretary Bethsy Zothanpari Sailo-in a hmanpui.

ABDM hi India rama healthcare system-te information technology hmanga tihchangtlun theihna tura hmalakna a ni a, September 27, 2021 khan prime minister Narendra Modi-a'n a hawng. Mizoramah pawh October 2022 aṭangin kalpui a ni.

ABDM hnuaiah hian India ram hriselna leh a kaihhnawih thilte digitisation kalpui mek a ni a; doctor, nurse, health worker, damdawi-in, laboratory leh hriselna lam kaihhnawih hrang hrangte thun luh vek tur a ni. India khua leh tuite Ayushman Bharat Health Account (ABHA) hmanga an dam lohna leh inentirnate digital health record kalpui a ni bawk. ABHA-ah hian Mizoram aṭangin mi 3,61,058 thun luh a ni tawh.

India rama mimal enkawl damdawi-in, clinic leh laboratory-te chak zawka ABDM-ah thun a nih theih nan sorkar laipui chuan Microsite Project a siam a; Mumbai, Ahmedababd leh Surat-ahte a bul ṭanna anga hlawhtling taka kalpui a nih hnuah ram pum huapin '100 Microsite Project' kalpui a ni leh ta a ni.

Microsite Project hnuaiah Mizoram chu India rama Microsite din hmasakna ber a ni a, bul ṭanna turin Aizawl district thlan a ni. Project kalpui turin State TB Elimination Programme nena thawk dun mek Youth for Action chu interfacing agency atan ruat a ni.