Party-in chhiat tâwkte an tawrhpui

Congress party leh Peoples Conference party chuan thuchhuah siamin, Bairabi-Sairang rél kawng siam mekah Sairang bula lei dawh lai chim leh mi eng emaw zatin an thih phah chu pawi an tih thu leh chhiat tâwkte an tawrhpui thu an tarlang.

MPCC chuan, chhiatna thlenna hmun chu nimin khan MPCC hruaitute'n an tlawh tih tarlangin, "Hnathawh ṭha tâwk lo awm anga lang leh nakina chhiatna dang a thlen tawh lohna tura uluk taka hna thawk turin hna thawktute an hrilh a, hnathawh kal mek pawh uluk zawka en zui an tum thu an hrilh," an ti.

Congress party hruaitute hian rel kawng siam meka Khamrang leh Sihhmui inkar te, Khamrang aṭanga lei verh zawh tawh te, lei dawh lai te, Mualkhang leh Sairanga rel chawlhhmun siam mekte an en nghal tih an tarlang.

PC party president Vanlalruata chuan, "Pawi kan tiin, nunna chánte kan tuarpui tak zet a, hliamte pawh enkawlna ṭha zawk nena an dam leh thuai kan duhsakpui tak meuh a ni," a ti.