Resolution pawmah MNF an lawm

MNF party chuan thuchhuah siamin, August 22, Thawhlehnia Mizoram Legislative Assembly session-ah Parliament-in a pawm tâk Forest Conservation (Amendment) Act, 2023 dodalna resolution put luh leh pawm a ni leh, bill pariat pawm a ni chu lawmawm an tih thu an tarlang.

Assembly session-ah Forest Conservation (Amendment) Act, 2023 dodalna resolution pawm chungchangah hian MNF chuan, "Kan ram tana him lo leh ṭha lo do kawngah central sorkar BJP kaihruai laka hamṭhatna awm thei pawh chàn huamin ram hruaitute'n ke an pên ngam tih a tilangah kan ngai," an ti.

MNF chuan, ni hnih awh Assembly session-ah minister-te'n an chanpual ṭheuhah ram leh mipui tana ṭha tura dan tihdanglam leh siamremah ngaihtuahna an séng nasa nia sawiin, "Dan siam tura thlan chhuah an ni tih a taka an lantir hi entawn tlak kan ti a, bill pariat a awm leh pawm a ni hi lawmawm kan ti," an ti a; bill pawm tâkte chu Mizo mipui leh ram tana thil ṭha zawk thlentu a nih an beisei thu an tarlang.