ZPM-in inthlan campaign an hawng: Mizorama sorkar kan hrawn tawh aia ṭha zawk kan tiam - Lalduhoma

Zoram Peoples Movement (ZPM) party chuan nimin khan Vanapa Hall-ah kumin Mizoram inthlanpui atana campaign hawnna inkhawm an buatsaih a, an president Lalliansawta'n a hawng. ZPM leader Lalduhoma chuan, Mizorama sorkar ding tawh ṭhin aia ṭha zawk ZPM-in an tiam thu a sawi.

Lalduhoma chuan, "Kan candidate zawng zawngte Pathian leh mipui hmaa ka eiru dawn lo ti ngam ṭhah an ni hi Zoram tan chanchin ṭha a tlingin ka hria," a ti a, ZPM an sorkar chuan eirukna an dodal tur thu a sawi.

ZPM Leader chuan, "Pathian chakna nen he ram zim te, mihring tlem te awmna hi kan chingfel thei ang tih hi kan ring tlat tur a ni," a ti a; "Sorkar kan neih ṭhin ang ni loin, kan sorkar hrawn tawh aia ṭha hi Zoram mipui hi kan tiam a ni," tiin a sawi.

Lalduhoma chuan Zoram a dam loh thu sawiin, Mizoram budget thar berah kumina leibat zat tura chhût chu cheng vbc. 13,584 a nih thu sawiin, "Kan pûk belh tura dah chu cheng vbc. 2,479 a ni. Chhungkaw 2,30,000 awm angah inngai ta ila, chhung tinin Rs 7,00,000 thlengin kan inchan kim thei tâwk chiah," a ti.

Mizoram chu RBI statement-ah a záwnin India ram state-a leiba nei tam ber a ni mek tih sawiin Duhoma chuan, "Kan sum pûkte hi loh theih lohin kum tin kan rulh a ngai a, kumina kan rulh tur hi cheng vbc. 1,442 a ni a, a pung kan rulh tel tur chu cheng vbc. 662 a ni," a ti a; kumin chhunga leiba rulh tur zat chu Mizoramin sum a lâk luh ve aiin cheng vbc. 123-in a tam zawk thu a sawi.

ZPM Leader chuan, hmasawnna atan bika sorkarin sum a ruahman capital outlay aia leiba rulhna tur hi cheng vbc. 408-in a tam zawk tih sawiin, "Kum khata hmasawnna tura sum kan dah theih zat aia leiba kan rulh cheng vbc. 400 chuanga a tam tawh chuan ram dinhmun a ṭha lo hle tihna a ni," a ti.

Sum dinhmun a ṭhat loh avangin an tlin loh leh tih theih loh tur sawiin an zuar ve dawn lo a ti a; restricted tender an kalpui loh tur thu sawiin sum dinhmun siam ṭhat an kalpui dawn tih a sawi.

Leiba tam viau mah se kut hnathawktute an hlamchhiah dawn lo tih sawiin Duhoma chuan, "Kan kut hnathawktute kha leh chen kâwng lo kham thlâwn tawh, kut durh thlâwn tawh, thlan far thlâwn tawhte hi kan sum neih ang angin kan tuamhlâwm dawn. Thlai thar chi li kan lei tur leh a rate nen kan puang tawh," a ti.

ZPM Leader chuan, ZPM sorkar se ti lote pawhin an sorkar an ring tawh nia sawiin, "Chu­tiang dinhmuna min hláng kaitu Pathian leh mipui chungah lawmthu ka sawi a ni," a ti a; mihring lamah an in­buat­saih fel thawkhata a hriat thu a sawi.

Inkhawmah hian ZPM President-in an party zawm thar a lawm lut a, chung zingah chuan Congress party ticket-a term hnih MLA lo ni tawh leh minister hlui KS Thanga a tel. ZPM vice president Rev. Dr K Thanzauva'n an party candidate turte mipui hmelhriattirna hun a hmang a ni.

LALDUHOMA THUSAWI DANGTE

▶ ZPM lakah mipui thikthu a chhia, ZPM mi leh sate ṭawngkam leh chet danah fimkhur a ngai.

▶ Mizoram siam ṭha turin eirukna tel loin Pathian chakna nen tih theih a ni.

▶ Health care-ah chhungkua 13,635 bill la pek loh, cheng nuai 6,289 batsak mek a ni.

▶ Health department-ah ringawt contractor leh supplier hnena leibá cheng nuai 1,974 a awm mek. PWD-ah contractor bill bá cheng nuai 21,967 a awm mek bawk.

▶ Sorkar hnathawk hlawh a hunah pek theih loh a ni deuh reng.

▶ Kumin kum tirah khan pensioner-te pek tur sorkarin a pek theih loh cheng vbc. 185 a awm.