Transport dept.-in thla thum chhungin tax/revenue cheng nuai 866 a hmu

Transport minister TJ Lalnuntluanga chuan, Transport department-in sorkar kum kal mek 2023-24 chhunga thla thum, April-June chhungin chhiah (tax/revenue) cheng nuai 866 an hmu tawh thu leh, MNF sorkar chhungin MST bus 18 lei belh a nih thu a sawi.

TJ Lalnuntluanga hian nimin khan Aizawl Press Club-ah thuthar thehdarhtute a kâwm a; a sawi danin, financial year 2023-24 atana Mizoram sorkarin Transport department sum hmuh tur a bituk (target) chu cheng nuai 5,000 a ni a, June 2023 thleng khan cheng nuai 866 an hmu tawh. Kum 2022-23 chhunga an target chu cheng nuai 4,003.21 a ni a, cheng nuai 4,903.34 hmuin, nuai 900.13 (22.48%)-in target an khûm a ni.

Transport Minister chuan, 2019 kum tàwpa lirthei registration thi tawh 45,646 chu tinung (renew) turin a neitute hnenah January 27, 2020 khan hriattirna pek a nih thu leh November 20, 2020-ah hriattir nawnna (reminder) pek leh a nih thu a sawi a, "December 15, 2020 hmaa tifel tura hriattir an ni. Hun tiam chhunga renew lo lirthei 43,137 chu February 18, 2022 khan blacklist a ni," a ti.

Minister sawi danin, January 1 - December 31, 2021 inkara lirthei registration thi 8,708 chu registration tinung turin April 7, 2022-ah hriattir an ni. Lirthei neitu eng emaw zatin tinung thar mah se, registration tihnun zui loh 8,495-te chu blacklist a ni a, chungte chu mimal lirthei 8,365 leh sorkar lirthei 130 a ni.

Kum 2018 tàwp lama MNF sorkar ṭan aṭanga tun thlengin Mizoram State Transport (MST) bus 18 lei belh a nih thu sawiin Minister chuan, "Tunah hian MST bus service lai 26 a awm mek," a ti a; MST bus-te chu hmun paruk - Aizawl aṭangin Lunglei, Rajiv Nagar, Marpara, Khuangthing, Mimbung leh Saipum/North Hlimen-ahte a tlan mek thu a sawi.

Transport Minister sawi danin, MST bus chuan man mi ṭhenkhat tan tihtlàwm (concession pek) a ni a; kum 2019 aṭanga 2022 chhungin mi 877 hnenah concession pek a ni. Concession pekte chu - kum 65 chung lam mi 644, hmeichhia kum 60 chung lam mi 172, cancer natna nei mi 40, mitdel mi 11, taksaa rualbanlo mi pasarih leh HIV/AIDS vei mi pathum an ni.

Kum 2019 aṭanga June 6, 2023 thlengin sorkar lirthei 432 hluihlâwn (condemn) a nih thu sawiin Minister chuan, "Hluihlâwn zingah hian Transport department motor 43 lai a tel. Motor condemn tawh tihralna aṭangin Transport department chuan Rs 27,34,163 vel sorkarah a chhûng lut tawh," a ti.

TJ Lalnuntluanga chuan, August 30, 2019 khan PWD aṭangin Transport department-in lui hmanga inkalpawhna, inland water transport (IWT) lama mawhphurhna an la tih sawiin, "Mizorama lui hman ṭangkai theihte dap chhuakin, IWT lama hma kan sawn theih nan theihtawpin hmalak a ni," a ti a; chutih rualin, Covid-19 leng vangin hma an lâk chak theih loh thu a sawi.

Minister-in a sawi danin, Mizoram sorkarin IWT a buaipuite chu - Tlawng lui, Chhimtuipui leh Khawtlangtuipui te a ni. Tlawng lui hi National Warterway-102 tih niin, Mizorama NW awm chhun a ni a, Khamrang aṭanga Gharmura, Assam thlengin a ni. Kum ruk kal taah Inland Waterway Authority of India (IWTA) hmalaknain survey tih a ni tawh a, lui awm dan a danglam hret hret avangin hydrographic and techno economic feasibility study tih leh turin sorkar laipuiah rawtna thehluh leh a ni.

Chhimtuipuiah Tuipui-D aṭanga Lomasu thleng tuikawng siam a nih theih nan sorkar laipuiin zir chian a remti tawh a, project estimate chu Rs 82,30,500 a ni. Ministry of Ports, Shipping & Waterway (MoPSW)-in survey tihna atan first instalment sum Rs 16,46,000 a rawn pe tawh a, survey ti tura thlan Rites Ltd., Gurgaon ten September 23 - November 6, 2022 khan an enfiah tawh a, survey report an nghak mek.

Khawthlangtuipui IWT atan kum 2005 velah survey tih a ni tawh a, report hmangin Rites Ltd-in MoPSW-ah DPR an thehlut a, project cost chu vbc. 22.93 a ni. Project hian Tuichawng luiin Khawthlangtuipui a finna aṭanga Kawrpuichhuah thleng a huam. DPR chu MoPSW-in an pawm tawh a, Phase-I atan Rs 6,17,86,000 pawm tawh niin, chuta ṭang chuan advance instalment Rs 1,23,57,000 pek chhuah a ni tawh. Hna thawk turin Transport department chuan Rites Ltd an thlang a, thuthlung an ziahpui tawh a ni.

Chhimtuipui luia Maurawp kai (Thlengang) leh Lungtian inkarah inkalpawhna ṭha a awm theih nan Maurawp kaiah marboat service siamna tur Mizoram sorkarah sum an dil tih sawiin TJ Lalnuntluanga chuan, "Marboat leh boatman hut siamna atan Mizoram sorkarin Rs 20,00,000 min pe a, marboat leh boatman hut siam tawh niin, June 1, 2022 khan LADC enkawl turin hlan a ni," a ti.

Transport Minister chuan, Silchar-a Mizoram Transport department ram, hun rei tak mimal hminga LSC awm chu April 13, 2021 khan Transport department hminga dah a nih thu a sawi a; Mizoram sorkarin January 19, 2019 aṭangin Transport department kutah ropeway a dah avangin Aizawl leh a chhehvelah ropeway siam a nih theih nan hmalak mek a nih thu a sawi bawk.