Rél kawng lei dawh chimah mi 21 ruang hmuh a ni tawh

Bairabi leh Sairang inkara rêl kawng siam meka Sairang Kurunglui chunga lei (bridge) dawh mek, August 23, Nilaini zing dar 9:30 pelha chimin a chimpuite zinga mi 21 ruang hmuh a ni tawh.

Lei chim ní, Nilaini khan mi 19 ruang hmuh niin, chung zinga mi 18 ruang chu hlàwm hman a ni a, an hmuh hnuhnun ber chu khua a thim tawh avang leh a delhtu lâk­sawn a hautak avangin lak chhuah hman a ni lo. Niminah ruang zawn leh lak chhuah hna thawh chhunzawm a ni a, tlai lam thleng khan mi pathum ruang lak chhuah belh a ni.

Nimin leh Nilainia ruang an hmuh tawh zawng chu 21 niin, lak chhuah vek an ni tawh a; ṭawih thei lo tura sawng­bawl (embalm) a nih hnuah Railways thuneitute hnenah an khuaa thawn turin hlan a ni ang. Lei chim ní-a ruang hmuhte chu an khaw lamah thawn a ni tawh.

Leiin a chimpui hi mi engzat chiah nge an nih chiang taka hria an awm lo a, mitthi zat pawh sorkar lama hotute'n an hriat dan leh sawi dan a danglam ṭhin. He thu ziah lai thleng hian ruang pahnih emaw, pakhat emaw hmuh a la ni loa hriat a ni.

Ruang zawng hian Sairang, Sairang Dinthar, Mizoram Police, BSF leh Central YMA hnuaia rapid respond team-te an thawk chhuak a ni.