Lirthei permit pek chhuah thar vangin Kolasib DTO pisaa kai tur dan an ni

State Transport Authority (STA)-in Kolasib khawpuiah auto-rickshaw permit leh two wheeler taxi permit 200 chuang a pek thar vanga lungawi loin Kolasib Auto Rickshaw Drivers' Union (KARDU) chuan nimin khan Kolasib-a District Transport Officer pisaa thawktute an dang.

Kolasib khawpuia tlân tur auto-rickshaw 388 a awm mek a, tun hnaiah permit thar 112 pek belh a nih bakah, two wheeler taxi permit 93 leh taxi permit 43 pek chhuah a nih thu sawiin KARDU hruaitute chuan, "Tunah pawh kan inṭàm chhuah ṭan tawh a, intlân chhâwkte kan sawi mek laia ṭum khatah permit tam tham tak pek chhuah a ni hi kan hrethiam lo hle a ni," an ti.

KARDU hruaitute chuan, permit pek hrim hrim chu an dodal lo tih sawiin, "Tun ṭumah hi chuan a tam tham êm a, stand pawh sorkarin min pek belh thei tawh lo," an ti a; permit pek thar zingah eizawnna atana hmang lo tur, chhungkaw khawsak harsa lo, ruling party block hruaitu te, JCB nei mek te, a hmaa permit hmu tawh te, chhungkaw khat aṭanga permit hmuh belhte an awm tih an sawi.

Kolasib aṭanga thu dawn danin, permit hmu thar zingah unaua dawng pathum an awm a, pafaa dawng pahnih, sorkar hna nei 12, auto-rickshaw nei lai 10, nikuma hmu tawh mi 20 an awm a; permit hralh tum 17 an awm bawk.

KARDU hruaitute chuan, an harsatna chu bialtu MLA K Lalrinliana, minister hnenah pawh an thlen thu sawiin, "STA thutlukna hi a hriatpui ve loh thu min hrilh a, hma min lakpui theih lohna niin kan ngai," an ti a; chuvang chuan, an thiam anga hmalakna kalpuiin, tiam chin awm loin Kolasib DTO pisaa thawktute an dang ta tih an sawi.

KARDU hruaitute sawi danin, kum 2021 khan Kolasib DTO chuan lirtheia páwl hrang hrang aiawhte leh consumer union ko khawmin, public transport permit chungchang a sawipui a; chumi ṭum chuan Kolasib district mipui zat thlirin ṭum khatah sorkarin permit 10 aia tam pe lo se, Kolasib-ah pali leh khaw dangah pahnih diat diatin pek ni se, tiin thutlukna an siam a ni.

Permit pek a nih thu an hriatin KARDU hruaitute chuan Transport minister TJ Lalnuntluanga a pisaah hmuh an tum a, mahse, hun àwl a siam thei lo nia sawiin, an lehkha chu a PA hnenah an dah a; August 23, 2023 tlai dar 5 ral hmaa permit pekna order hi sût turin an ngen a ni. An lehkha copy chu bialtu MLA/minister K Lalrinliana leh bawrhsap John LT Sanga hnenah an pe bawk.

Hetih lai hian, Kolasib khawpui chhunga tlân tura tih passenger phur lirthei hrang hrang permit-te chu a hmutute kut a la thleng lo a, lak chhuah dilna an thehlut mek a ni.