Mau lian leh chhah chìn punah sorkarin hma a la mek zel
Chief minister Zoramthanga hoin nimin khan CMO conference hall-ah mau chungchang sawiho a ni a; Chief Minister chuan, mau lian leh chhah chi chìn pun lamah sorkarin hma a la chhunzawl zel niin a sawi.
CM Zoramthanga ho hian National Bamboo Missions (NBM) leh Asian Development Bank (ADB) ṭang dunin an kalpui tur Bamboo Value Chain Development in Northeast (BVCDNE), Mizorama kalpui dan tur inràwnkhawmna neih a ni a, Mizorama mau sâwngbàwlna industry neitute nen sawiho a ni.
BVCDNE hi India hmarchhak state pangaa mau sawngbawlna tihhmasawnna tur hmalakna kalpuina tur a ni.
Zoramthanga chuan, tun hma deuh aṭangin Mizorama mau behchhan industry-te'n furniture lam an hawi deuh vek tih sawiin, "Kan mau neih sate hi a têt deuh avangin chutiang atan chuan a hman tlak vek chiah si lo a, harsatna an tâwk ta a ni," a ti.
Chief Minister chuan, industry-te'n an hman theih tur mau lian leh chhah chi chìn pun lamah Mizoram sorkarin hma a la mek zel tih a sawi a; NBM leh ADB ten hma an lakna tur chungchangah, Pathianin Mizorama mau a dah sate hman ṭangkai dan sawiho tura kohkhawm an nih thu industry neitute a hrilh.
Industry neitute'n Mizorama mau awm sate hmang ṭangkai a, a hralhna àwm an hria emaw, India ram chhung leh ram pawna company lian zawkte nena thawhhona mumal tak an kalpui thei dawn emaw a nih chuan, sorkarin theihtawpa thawpuia an ṭanpui tur thu a sawi bawk.
Horticulture secretary K Lalthawmmawia chuan, Horticulture department-in NBM leh ADB-te'n hmarchhak state pangaa hmalakna neih an tum dan tlangpui a sawifiah a; chain development tih a nih angin, industry inring tawn leh ei bângnáwi nei lo (circular economy, zero waste) awmna tur Integrated Bamboo Development Park din chu a tum ber a nih thu a sawi.
Industry kalpui mektute chu Mizorama mau awm sa hmang ṭangkai tura ruahmanna an neihte a rang lama thehlut tura tih an ni. An thehluh turah chuan, finish product emaw, semi-finish product emaw, company lian zawkte koh luh leh thawhpuina lam hawi leh hralhna lama harsatna awm lo tur mau hman ṭangkaina eng chi pawh a leng a ni.