MPCC hotute'n Shining Star School an tlawh

Mizoram Pradesh Congress Committee president Lalsawta, treasurer Dr Lalmalsawma Nghaka leh hruaitu dangte'n nimin khan Shining Star Special School, Republic Veng an tlawh a, sikul hotute leh zirlai nu leh pate nen an inkâwm.

Lalsawta chuan, Shining Star Special School chu sikul pawimawh leh ṭangkai a nih thu sawiin, "Thawktute leh enkawltute pawh rawngbawlna thûk tak thawk an ni," a ti a; rualbanlote enkawl ṭhat a pawimawh thu leh an tana zirna sikul leh hmanraw ṭha neih a pawimawh thu a sawi.

Dr Lalmalsawma Nghaka chuan, rualbanlote enkawlna hmun leh zirna sikul Mizoramin a mamawh thu leh khawtlangah himna ṭha an neih a pawimawh thu a sawi a, "Rualbanlote hi mahni kea ding a, intodelh a, eizawng thei khawpa chher theih an ni a, mi bik tak an ni. Rualbanlote an dinchhuahna leh society-a zalen taka ei an zawn ve theihna siam kan tum a, ruahmanna siam a ni," a ti.

Shining Star Special School hi Society for Rehabilitation for Persons with Disabilities-in an din a ni a, zirtirtu parukin naupang 32 an enkawl mek.

MPCC tarlan danin, kum 2011 chhiarpuia a lan dan chuan, Mizoramah rualbanlo mi 15,160 an awm a, thingtlangah 8,627 leh khawpuiah 6,533 an awm a ni.