NCC cadet-te chawimawina hlân

Sports & Youth Services minister Robert Romawia Royte chuan nimin khan a pisaah 1 Mizo Air Squadron NCC hnuaia cadet pahnih leh officer pahnih hnenah chawimawina a hlân.

SYS Minister-in chawimawina a hlante chu - Republic Day 2023 Camp, New Delhi-a tel cadet under officer pahnih - Kenny Lalrinawma Singh leh Laltlansangi, Pachhunga University College-te leh, caretaker officer pahnih Lalrinsangi Nghinglova leh Sanju Karwar te an ni a; cadet under officer-te hnenah laptop leh caretaker officer-te hnenah Rs 5,000 hlan a ni.

Robert Romawia Royte chuan, 1 Mizo Air Squadron NCC cadet pahnihte'n India hmarchhak bial hminga Republic Day Camp, New Delhi-a tel thei tura intihsiakna hautak tak an paltlang leh, a ken tel intihsiakna hrang hrangah an hlawhtling chu chhuanawm a tih thu a sawi a, "Naupang tê ni chunga hlawhtlinna an chang hian an kal zelna turah phûrna leh chona thar anmahni leh mi dangte a pe dawn a ni," a ti.

1 Mizo Air Squadron NCC hi May 11, 2011 khan Aizawlah din niin, college paruk leh high school 19-ah kalpui a ni a; NCC cadet 1,800, senior division/ senior wing 300 leh junior division/ junior wing 1,500 an awm mek a ni.