KHAWTHLIR

DC-in in thiat turin hriattir

Serchhip bawrhsap David Lalthantluanga, Competent Authority for Land Acquisition (CALA) chuan August 23, Nilaini khan NH-54 laih zauhna atana zangnadawmna dawng tawh, an in la ṭhiat lote chu ni 10 chhunga ṭhiat vek turin a hriattir. Thupek zâwm lo te chu IPC Section 188 hmangin thubuai siamsak an nih tur thu a tarlang bawk.

Thuneitute phût

Mamit Chhimveng VC, YMA, MUP leh MHIP chuan thuchhuah inṭawm siamin, August 23, 2023-a thia chhar an veng mi Lalremruata (kum 11) s/o Lalvul­mawii, Mamit Chhimveng chu thah ni ngeia an hriat thu tarlangin, "August 25 ral hma ngeia pawikhawihtu hi chhui chhuak tur leh a thih chhan dik tak puang chhuak turin thuneitute kan phût. Chhui chhuah a nih loh chuan Chhimveng mipuiten hma kan la ang," an ti.

Roll ennawn sawiho

Electoral roll observer Lalzarmawii kaihhruaiin nimin khan Khawzawl DC conference hall-ah sorkar hotute leh khawtlang hruaitute'n E-roll ennawnna, 2nd Special Summary Revision of Photo Electoral Roll, 2023 chungchang an sawiho. Tarlan danin, Tuichang bialah voter mipa 8,690 leh hmeichhia 8,750 an awm mek a, an vaiin mi 17,440 a ni.

Sipai lâk rûnpui

Aizawla Army Recruiting Office chuan September 5-6, 2023 chhungin Rajiv Gandhi Stadium-ah sipai lâk rûnpui thawh hnihna a buatsaih dawn. Sipai lakna hi district hrang hrang aṭanga thlan chhuah (shortlisted candidate)-te tana buatsaih tur niin, inlan turte chu September 5, 2023 zing dar 3 thleng RG Stadium-ah admit card leh lehkha pawimawh kenga inhriattir tur a ni.

Hnathawh enfiah

Minister Lalrinawma chuan nimin khan a bial Tuikum constituency chhunga khaw hrang hranga hmasawnna hnathawhte a enfiah. Minister chuan, khawtlang mipuite'n an duh leh mamawh an thlenah theihtawp chhuahpui zel a tum thu sawiin, "Vantlang hmunhma leh zirna-inte hi ṭha leh dimdawi takin enkawl ila, khawtlang mipuite'n mawhphurhna sang tak in nei," a ti.