BJP nena inkungkaihah MNF leh ZPM puh

Mizoram Pradesh Congress Committee (MPCC) vice president Lal Thanzara chuan, sorkar laipuiah BJP kaihhruai sorkar paihthlak ngei a ṭul nia sawiin, MNF leh ZPM party-te chu BJP nena inkungkaihna nei niin a sawi.

Lal Thanzara hian nimina Aizawl North-III Congress Ṭhalaiin Alpha Park Futsal Ground-a futsal tournament an buatsaih a hmanpuinaah thu sawiin, "BJP-ten India ram hi Hindu rama siàm an tum avangin firfiak takin an che," a ti a.

MNF party chu Mizo mipui hriata BJP laka hmai phih fai tumah puhin Lal Thanzara chuan, "An laka inhnûkdâwk tak tak ngam si lo leh an chakna rin duh si an ni. ZPM-te pawh hi BJP thawhpui a, an sum hman hreh miah lote an ni," a ti.