LADC-ah dan ang takin BJP-in Sorkarna an din - Mizoram BJP

Mizoram BJP vice president JB Rualchhinga chuan nimin khan Aizawl Press Club-ah thuthar thehdarhtute a kâwm a, Lai Autonomous District Council (LADC)-ah dan ang thlapin BJP sorkar din a nih thu a sawi.

JB Rualchhinga chuan, MNF-in an sorkar phat aṭangin Mizorama ADC pathuma sorkarte chu MNF-a an inleh loh chuan ṭhiaha an vau bakah kawng hrang hrang dangin an vau thu a sawi a, "CADC-a BJP leh United Legislature Party-in sorkarna an siam phei chu luhchhuahin, sorkarna an chhuh sak a ni. Hei hi BJP central office khuan a la chhinchhiah reng," a ti.

CADC ang thoin LADC leh MADC-ah pawh MNF-in hmalak an tum nia sawiin Rualchhinga chuan, "MADC-a Congress sorkar mipui thlan ning lutuk chuan BJP-ah kum 2019 khan an inleh phah hial a ni. LADC pawh chutiang tho chuan ṭhiahah vauin, an hrêk bet a ni," a ti a; LADC-ah chief executive member (CEM) T Zakunga leh a hote ning lutukin BJP an zawm phah niin a sawi.

JB Rualchhinga sawi danin, LADC-a sorkarna chelh mektu T Zakunga leh hote'n BJP an zawm aṭangin MNF sorkar Zoramthanga kaihhruaiin an tibuai zui zel a, Lawngtlai khawpuiah kawng hrang hrangin harsatna an siam. Tun hnaiah phei chuan MNYF leh MNWF-te'n LADC hotute pisa kai tur an dang a, hna thawk thei loin an siam a ni.

CM Zoramthanga kaihhruai MNF sorkar chu 'Arakan style' ni loa hma la tura an phût thu sawiin JB Rualchhinga chuan, "Pu T Zakunga leh a kaihhruai LADC sorkar hi minority a nih leh nih loh chu India constitutional method hmangin, house-ah floor test neihtir tura hma la turin kan hriattir a ni," a ti.