Covid-19 vei fa naupangte enkawlna tur bik siam dawn

Health department leh Social Welfare department chuan nimin khan Secretariat Conference Hall-ah  naupang, an nu leh pate'n Covid-19 an vei avanga in lama enkawltu nei lote enkawl dan tur an ruahman.

He hun hi Health minister Dr R Lalthangliana'n a kaihhruai a, Covid-19 Medical Operation Team chairman Dr ZR Thiamsanga, MLA, department pahnih hotute leh Indian Medical Association aiawhte an tel a; ruahmanna siamtute rawtna an thlirho.

Ruahman dan chuan, Bal Bhavan, ITI Venga mi chu naupang, an nu leh pate leh an chhungte, Covid-19 veite'n enkawlna hmuna an awmsante enkawlna atan siam a ni a, district dangah pawh a remchan dan anga siam tum a ni. Naupangte chu khung hran ngai an nih vangin quarantine facility inkaihhruaina anga enkawl a nih rualin, child care institution anga enkawl tur a ni.

Naupang awm turte chu Covid-19 vei lo, an chhungte positive vek si, in lama enkawltu nei lo emaw, naupang enkawltu ber a positive vanga a awm loh hlâna an chhungkua naupang tan a him tâwk loa ngaihte an ni a; an dinhmun chu local task force, Health leh Social Welfare department hotute'n an enfiah ang.

Naupangte chu an ei leh in tur Women & Child Development directorate-in an ngaihtuah dawn a, social worker-te'n an enkawl ang a, an pualin hun hlimawm buatsaih ṭhin a ni ang. Guidelines milin an swab sample endik ṭhin tur a ni bawk.