MSHCS-ah inziak lut an tlem tial tial; Inziah luh man hlawh atan hman a ni

Mizoram sorkarin a khua leh tuite an damloha an inenkawlna senso a tum­sakna, Mizoram State Health Care Scheme (MSHCS)-ah inziak lut an tlem tial tial a, kum 2023-24 atan inziak lut mi (chhungkua) 26,569 an awm. Kum kal mek 2023-23 atana inziah luh man (enrolment) lut zinga Rs 1,29,59,869 chu office enkawlna leh thawktu hlawh atan hman a ni tawh.

RTI Act tlawhchhana zawhna Mizoram State Health Care Society SPIO-in a chhan danin, MSHCS policy kum, April 2023 - March 2024 atan mi 26,569 an inziak lut a, kum 2022-23 atana inziak lut 39,505 aiin 12,936-in an tlem zawk a, kum hmasa aia kumina a tlem zawkna hi 32.75% a ni.

MSHCS-a inziah luh man hi ration card mila siam a ni a; Antyodaya Anna Yojana (AAY) - card eng tan Rs 200, Priority Household (PHH) - card pawl tan Rs 1,000, National Food Security Act (NFSA) hnuaia awm lo - card var nei tan leh ration card nei lo tan Rs 2,000 ve ve a ni.

RTI Act tlawhchhana zawhna chhànnaa a lan danin, MSHCS-ah hian policy year hlui zawk hman hnuhnun ber kum, October 2020 - September 2021 khan mi 1,13,720 an inziak lut a, kumin 2023-24 atana inziak lut zat nen a inthlauhna chu 87,151 a ni a, a tlakhniamna percentage chu 76.64 a tling.

MSHCS-ah hian inziah luh man (enrolment fee) kum 2021-22 khan Rs 3,21,67,050 a lut a, kum 2022-23 khan Rs 4,96,73,240 lutin, kum kal mek 2023-24 ah Rs 3,36,79,860 a lut a ni.

Mipuiin MSHCS-a inziah luh man an pek pawisate chu MHSCS office enkawlna leh hnathawkte hlawh atan hman ṭhin a ni a; MSHCS office enkawlna leh hlawh atan kum 2021-22 khan Rs 1,91,52,077, kum 2022-23 khan Rs 3,72,82,017 hman a ni. Kum kal mek 2023-24 atana enrolment fee pawisate chu August 15, 2023 thleng khan office enkawlna leh thawktu hlawh atan Rs 1,29,59,869 hman a ni tawh bawk.