Rél kawng chima thite hmuh kim a ni; Railways-in lei chim chhan chhui tur a din

August 23, 2023 zing lam dar 9:30 vela Bairabi-Sairang rél kawng tur Kurunglui chunga lei dawh mek a chim vanga thite ruang chu nimin khan hlâwm kim a ni. Hetih lai hian, Ministry of Railways chuan rél kawng tur lei dawh mek chim chhan chhui chiang tur committee a din.

Vanglaini thu dawn danin, lei chima mitthi ruang hmuh hnuhnun ber chu nimin chhun dar 12:45 vel khan hmuh a ni a, lak chhuah zui a ni. Lei chim ní, August 23 khan ruang 19 hlawm niin, August 24-ah mi pathum ruang lak chhuah leh a ni a; niminah mi pakhat ruang hlâwm leh niin, mitthi mi 23-te ruang chu lak chhuah kim a ni ta a ni.

Ruang zawng hian Sairang, Sairang Dinthar leh Sihhmui khuaa mi tlawmngai te, Mizoram Police, BSF, National Disaster Response Force, State Disaster Response Force leh Central YMA hnuaia quick respond team-te an thawk chhuak. Police-te chuan an uisathiam an thawh chhuahpui a, ruang hnuhnung ber an hmuhna pawh hi uisathiamin a kawhhmuhna lai a ni.

Mitthite hi West Bengal-a Malda district-a mite vek an ni a; an ruangte chu ṭawih thei lo tura sâwngbàwl (embalm) a nih hnuah an khuaa thawn turin Ministry of Railways thuneitute hnenah hlan a ni.

Ministry of Railways chuan August 24, Ningani khan rél kawng chim chhan chhui chiang tur High Level Committee a din a, thla khat chhunga report peih hman turin a hriattir.

High Level Committee-ah hian chairman chu RDSO PED-II BP Awasthi niin, member secretary chu IIT, Delhi-a Struc­tural Engineering de­pt-a associate dean Dr Dipit Ranjan Sahoo a ni a; member pahnih awmin, IRICEN Bridges-a thawk Prof. Sharad Kumar Agarwal leh Northeast Frontier Railways chief bridge engineer Sandeep Sharma te an ni.