Ruihhlo kawltute thiam loh chantir
Lunglei District Court-a Special Court (NDPS Act) chuan khuh damdawi (codeined based cough syrup) kawl vanga man Lalramdina s/o C Vanlalchhunga (L), Lunglei Venglai leh Zothanpuia s/o Lalthankhuma, Lunglei Chanmari-I te chu August 23, 2023 khan thiamloh a chantir a; táng tur leh pawisa chawi turin a hrem.
Special Court (NDPS Act), Lunglei chuan khuh damdawi kawl vang thoin Suiliana s/o Vanlaltluanga, Lawngtlai College Veng leh H Lallianpuii d/o Rûmvunga, Lawngtlai Bazar Vengte pawh August 24, 2023 khan thiam loh chantirin, thla nga ve ve táng tur leh
Rs 90,000 ve ve chawi turin a hrem bawk.
Thu dawn danin, February 14, 2023 chhun khan Excise & Narcotics department (END) mite chuan Lunglei Venglaiah Lalramdina scooter khalh lai aṭangin khuh damdawi bûr 320 a man a, a hnuah damdawi neitu Zothanpuia an man leh. NDPS Act, 1985 tlawhchhanin thubuai an ziak lut. Zothanpuia chu Lianhna Drugs Store, Lunglei Chanmari hnuaia medical representative (MR) a ni a, MR licence nei a nihna hmang dik loin Lalramdina nen ruihhlo an khawih a ni.
Lalramdina leh Zothanpuia te hi special judge (NDPS Act) Rohlupuia chuan thla li ve ve táng tur leh Rs 80,000 ve ve chawi turin a hrem. Pawisa an chawi loh chuan thla li dang tàn belh turin a ti bawk.
April 10, 2023 tlai khan Lunglei Venglaiah Suiliana car khalh lai aṭangin END chuan codein based cough syrup búr 1,497 an man a, a thurualpui H Lallianpuii pawh zan dar 11-ah an man ve leh a ni.
H Lallianpuii hian Lawngtlai Bazar Vengah an makpa drug licence hmangin damdawi dawr a nei a, RT Daniels Pharmacy hnuaiah MR a ni bawk. Lallianpuii hian Suiliana chu Rs 6,000 hlawh turin damdawi a ken kualtir a ni.