Thawktu indaih lohna phuhru turin sorkarin ṭan a lâ - Dy CM Tawnluia

Mizoram Civil Service Association (MCSA) chuan nimin khan Aijal Club-ah inkhawmpui vawi 47-na an hmang a, deputy chief minister Tawnluia'n a hmanpui. Tawnluia chuan, sum leh pai harsatna karah thawktu indaih lohna phuhru turin sorkarin ṭan a lâk thu a sawi.

Deputy Chief Minister chuan, ram rawngbawlnaah chanvo hrang hrang a awm thu leh mahni kuta tla mawhphurhnate ram leh hnam tan ṭha taka hlen zel chu mi tin mawhphurhna a nih thu a sawi a, "Sum leh pai harsatna karah thawktu indaih lohna phuhru turin sorkarin ṭan a la zel a, service tihchangtlun leh tihphuisui kawngah pawh ngaihtuahna a séng a ni," a ti.

Hripui léng leh harsatna dang dang vangin sum tam tak sên a nih thu sawiin Tawnluia chuan, "Hmasawnna tura ruahmanna awmte duh anga kalpui theih a ni lo," a ti a; chuti chung chuan hna thawh theih hun chhungah theihtawp an chhuah a, an hmalaknate a chhiat loh thu a sawi.

Tawnluia chuan, MCSA member-te chu sorkar kutke pawimawh an nih avangin sorkarin an tana hamṭhatna leh ṭul dangte a ngaih pawimawhsak ṭhin nia sawiin, MCSA thil thlente chu a ṭul anga bawhzui tum a nih thu a sawi a; tih dan phung pangngai maia lungawi lo a, awlsam leh mawihnái zawk, mipui tana zângkhai leh ṭha zawkin hna thawh tum ṭhin turin MCS officer-te a chah.

Inkhawmpuiah hian MSCA senior adviser Dr H Lalthlangliana'n MCS officer thar mi 15 a lawm lut a, MCS aṭanga IAS-a kai mi pali - Zorammuana, Ramdinliani, David Lalthantluanga leh Maria CT Zuali te lawmpuina an hlan. Khuallianin MCSA magazine RAHBI a tlangzarh a, MCSA hruaitu thar an thlang bawk.