Sikul 52-ah herbal garden siam mek

Ministry of AYUSH chuan nimin khan Taj Vivanta, Guwahati-ah West Bengal leh hmarchhak state-te tan Regional Review Meeting on AYUSH Programmes an buatsaih a; Mizoram Health minister Dr R Lalthangliana chuan, ramhmul damdawi tihlârna leh a hlutna inzirtirna atan sikul 52-ah School Herbal Garden siam mek a nih thu a sawi.

Dr R Lalthangliana chuan, National AYUSH Mission chu Mizoramah kum 2014 aṭangin kalpui a nih thu a sawi a, "India ram state tê zingah a ti ṭha ber kan ni thei. Mizoram State Medicinal Plants Board chuan zirbingna leh tihhmasawnna lamah nasa taka hma a la a, ramhmul damdawi chawi lâr nan leh a hlutna inzirtir nan School Education department nen ṭang dunin district palia sikul 52-ah School Herbal Garden siam mek a ni," a ti.

Health Minister chuan, Mizoramah AYUSH hospital din belh a, doctor-te pawh tam zawk lak belhna turin a bik taka ruahmanna siam ṭha a tih thu a sawi bawk.

Ṭhutkhawm hi Ministry of AYUSH secretary Rajesh Kotecha-in a kaihruai a; sorkar laipuia AYUSH minister of state Sarbananda Sonowal, Assam chief minister Himanta Biswa Sarma leh AYUSH minister of state Dr Munjpara Mahendrabhai Kalubhai te pawhin thu an sawi.

Dr R Lalthangliana hi Health principal secretary Esther Lal Ruatkimi leh AYUSH deputy director Dr S Mara Thansiami ten an ṭawiawm a ni.