CM-in Bairabi SDO (Civil) a hawng

Chief minister Zoramthanga chuan nimin khan Bairabi Civil Sub-Division pisa thar a hawng. Hawnna inkhawmah thu sawiin, "Kan sorkar hian hmasawnna hnaah pawh, inrêlbàwlna lamah pawh kan ramin a mamawhte tihhlawhtlin zel a duh," a ti.

Bairabi Civil Sub-Division hawnna inkhawm hi Kolasib bawrhsap John LT Sanga'n a kaihruai a; SDO (Civil) hna chelhtu tur sorkarin a tihchhuah thuai beisei a nih thu leh, SDO thar a awm hma chuan Bairabi SDC Dr Lalramdintluanga'n SDO mawhphurhna a lak tel dawn thu sorkar thuchhuahin a tarlang.

CM Zoramthanga chuan, Bairabi mipuiin hun rei tak aṭanga an lo beisei SDO (Civil) an nei ta chu a lawmpui thu sawiin, "SDO (Civil) hi tunah a thar mai a la nih avangin tihhmasawn zelna tur tam tak a la awm a, Pathian zarah hun ṭhate kan nei zel a nih chuan hmabakte chu kan thawk zel dawn a ni," a ti.

Covid-19 hripuiin Mizoram a tuam laiin Bairabi chu hmun pawimawh a nih angin hmasawnna tur sum an dawng ṭha thawkhat nia sawiin Zoramthanga chuan, "Mamit panna kawng te, Zamuang lam kawng te, Kolasib lam kawng te, Hailakandi lam kawngpuite leh Tlawng lui lian laka invennate pawh hmalakna tam tak kan nei," a ti al Bairabi-in hma a sawn chhan pakhat chu bialtu MLA-in a thawh ṭhat vang leh a inpekna vang a nih thu a sawi.

Bialtu MLA K Lalrinliana, minister pawhin thu sawiin, "SDO (Civil) administration-in a ken tel sorkar hmunhma dangte pawh theihtawpin kan ûm zui zel dawn," a ti.