KHAWTHLIR

Serchhip DC thar Dr Lalzirmawia Chhangte leh Serchhipin an thlen tur KTP General Conference Organising Committee hruaitute chu January 15, Nilaini zan khan DC banglaah an inkawm a; KTP General Conference thleng tura inbuatsaihna leh hmalak tawhnate an inhrilhfiah. Bawrhsap chuan, KṬP conference atan theih­tawpa hmalakpui a tum thu a sawi a, conference ṭanpui nan Rs. 5,000 a hlân nghal a ni.

DAY-NULM hnuaia Shelter for Urban Homeless Scheme hmangin nimin khan Mamit DC Conference Hall-ah Mamit khawpuia home pathum - Joshua Home, Buannel Home leh Emau Specialised Adoption Agency-te hnenah district bawrhsap Dr Lalrozama'n bungrua (refurbishment item) chi hrang hrang a sem. Dr Lalrozama chuan, home hrang hrangte'n UDPA department kaltlanga home enkawlna tura mamawhte an dawng chu a lawmpui thu sawiin, home enkawlnaah theih­tawp chhuaha ṭan la zel turin a fuih.

Mizoram police din champha lawm nan Home department-a police-te chuan blood donation camp an huaihawt mek zel. Nimin khan Aizawl Civil Hospital tan Traffic police-te'n thisen unit 58 pein, a petute mipa 56 leh hmeichhia pahnih an ni a; Aizawl DEF pawhin unit 23 pein, a petute mipa vek an ni.

Industrial Development Board vice chairman C Ramhluna chuan nimin khan Secretariat Block-C building-a a pisa thar a luah ṭan. Pisa thar luah ṭan pualin inkhawm tawi buatsaih a ni a, C Ramhluna bakah MNF vice president Lalthlengliana ten thu an sawi.

SIPMIU (NERCCDIP), Aizawl chuan January 21-25, 2020 chhungin zing dar 6 aṭanga zan dar 9 thlengin Bethlehem Vengthlang kâwn kawngpuiah man-hole leh pipe phûm hna an thawk dawn a; hei vang hian he kawngpui hian hna thawh chhungin lirthei eng chi pawh tlan theih a nih dawn loh thu Traffic SP Rodingliana Chawngthu chuan a tarlang. Hnathawktute tibuai thei turin kawng sirah lirthei leh bungrua dah phal a nih loh thu a puang bawk.