KHAWTHLIR

National Medical Commission (NMC) chuan Zoram Medical College chu medical college ni zel tur a nih leh nih loh a dinhmun an endik dawn hnai. Endikna hmachhawn turin ZMC chu an inbuatsaih mek a, nimin khan director Dr T Lalhmangaihi hoin ZMC College Development Council Committee an ṭhukhawm. NMC-in a endik tur hi renewal inspection vawi thumna tur a ni a, MBBS batch lina la turin a tlin leh tlin loh an endik dawn a ni.

State Referral Hospital (SRH) ICU-ah Covid-19 vei panga enkawl mek an ni a, an zinga pathum chu ventilator hmanga enkawl niin, pathum dang chu oxygen pek mek an ni. SRH-ZMC Bulletin tarlan danin, SRH-ah hian nimin khan hripui vei mi panga dah luh an ni a, anni nen mi 67 enkawl mek niin, kum 60 chung lam mi 24 leh kum 14 hnuai lam pathum an tel. Isolation ward-ah mi 62 awmin, ngaihtuahawm an awm lo.

Aizawl District Congress Committee (ADCC) chuan thuchhuah siamin, Aizawlah inkhàrkhip a nih avanga harsatna tâwk mi rethei zawkte tan chhawmdawlna tur special package siam turin Mizoram sorkar an phût a, "Kan dam khawchhuahna atana lockdown ngai ṭhin avangin ni tina eichawp zawng ṭhinteah lungngaihna leh ṭahna a thlen mek. Chu'ng harsatna tâwk mekte leh rethei zawkte dinhmun hriatpui chunga chhawm­dawlna special package siamsak ngei turin sorkar kan phût a ni," an ti.

Tuialhthei leh eirawng­bawlna gas la tura Mizoram sorkarin Manipur-a a tirh truck leh tanker zinga ṭhenkhat chuan November 5, Ningani zan khan Aizawl an rawn thleng a; Aizawl Municipal Corporation (AMC) pisa kawtah FCSCA minister K Lalrinliana hoin sorkar hotu ṭhenkhatte'n an lo hmuak. Lirthei rawn thlengte chu gas phurtu truck pathum a ni a, hmuahnaah hian MLA C Lalmuanpuia, AMC deputy mayor Lalringliana leh IGP John Neihlaia te pawh an tel a ni.