BJP hi mi retheite tana awm a ni - BJP President

BJP, Mizoram president Vanlalhmuaka chuan, BJP chu mi rethei, hmasawn mamawh ngawih ngawihte tana awm an nih thu leh Mizorama sorkar awm tawhte'n mi retheite a dera an hmangaih thu a sawi.

Vanlalhmuaka hian nimina BJP-in Aizawla an pisaa political session an neihah thu sawiin, "BJP hi mi hausa leh mi awm thei, development mamawh lote tan a ni lo a, mi rethei leh harsate'n kan chanvo dik tak kan chan theihna tura awm kan ni. Mi retheite'n hamṭhatna kan nei a nih ngat chuan mi hausa leh sumdawngte tan pawh malsawmna a awm nghal dawn," a ti.

BJP President chuan, "Mizorama sorkar tawhte chuan mi retheite hi kan hmu ringawt a, a derin kan hmangaih a, kan retheih ngaiin kan la rethei reng mai a ni. Heng thlenna chhan chu corruption vang a ni," a ti a; Mizorama hmasawnna a awm theih loh chhan chu corruption vang a nih thu a sawi.

Mizorama sorkar tawhte'n a takin corruption an do ngam lo nia sawiin Vanlalhmuaka chuan, "Kan state-ah development a chhiat phah hle. BJP chuan Mizoramah sorkarna kan chang a nih ngat chuan mi retheite tan zalenna káwl a êng dawn a, CBI koh luh intihṭhaih tawna kual kual loin kan ram hmelma eirûkna hi kan hnungkhirh ngei ngei dawn a ni," a ti.

Mizoram BJP President chuan, Bible-in mi rethei leh pachhiate a ngai pawimawh tih sawiin, "Chutiang tan chuan BJP Pu Modi kaihhruai hian hna a thawk a, hma a lak reng avangin Pathian malsawmna pawh kan chan phah a, Pathian thutiam kan kalpui avangin malsawmna chu kan chang mai a ni," a ti a; hmasawnna ruai ṭheh turin Mizoram mipui a sáwm a ni.