Sem policy-in Mizoram a tichhia - Dr Vanlalthlana

MLA Dr Vanlalthlana chuan, sem policy-in Mizoram a tihchhiat thu leh, taimakna, thawhrimna leh intodelhna hmangin ZPM-in Mizoram khai chhuah an tum thu a sawi.

Dr Vanlalthlana hian nimin khan Ramhlun Indoor Stadium-a Aizawl North-II ZPM block conference a hmanpuinaah thu sawiin, "ZPM-te hi kan ropui teh chiam lo a, keimahni tâwkah beihte pawh kan tâwk ve ṭhin. Pathian zarah kan pung zel a, zâm loin kan kal zel dawn. Sum leh pai hmachhuan tur kan nei lo a, taimakna, thawhrimna leh intodelhna hmangin kan ram hi khai chhuah kan tum," a ti.

Aizawl North-II MLA chuan, "Sem policy hian kan ram a tichhia a, ram ei leh bàr chu sawi loh, kan rilru thlengin nghawng ṭha lo tak a nei," a ti a; mipuite'n an chakna - an vote thiltihtheihna an hriat a, huaisen taka an hman a ngaih thu a sawi.

Aizawl West-II biala ZPM candidate tur Lalnghinglova Hmar pawhin thu sawiin, inthlan turah ṭan rual loh chuan an chak thei dawn lo tih a sawi a, "Kan zavaia ṭan rualna ṭha tak kan neih avangin inthlan kan hmachhawn turah hian Pathian leh mipui zarah hnehna kan chan ngei kan beisei," a ti.

Thu sawitu dang C Lalchhandami, bialtu councillor chuan, "Kan ram hruai mektute leh hruai tawhtute'n an theihtawpin hna an thawk a, thil tam tak min hnutchhiah. Mahse, hei hian ṭhalaite tuihâlna a chhâwk zo lo a, kan chhehvel ramte hmasawnna an hmuhin kan ram tan tih theih ve tho a ni tih an hria a ni," a ti a; Mizoram ṭhalaite rualawhna chu a taka thlentir turin ZPM-in policy mumal tak an neih thu a sawi.