MNF sorkar mek a vanduai - MLA Zira

MNF party chuan nimin khan Mizo Hnam Runah inkhawm an nei a, thu sawitu MNF adviser H Lalzirliana, MLA chuan, MNF sorkar chu harsatna hrang hrang thleng avanga an vanduai thu a sawi rualin, an chêt ṭhat thu a sawi.

H Lalzirliana chuan, MNF sorkar mek an vanduai thu sawiin, "Hun harsa tak kara sorkar kan ni. Covid hripui léngin mimal leh sorkar a nghawng a, sorkar laipui economy dinhmun pawh a tlakhniam phah vek a, factory leh industry hrang hrang khâr a ngai a, chu chuan state hrang hrangte min nghawng vek a ni," a ti.

Ramri buai hmachhawn danah MNF sorkar a che ṭha nia sawiin H Lalzirliana chuan, "Hmarchhak state-te chu Assam aṭanga indang vek kan ni a, Assam laka ramri buai nei vek kan ni. Zahpahlo taka Mizoram min rawn hnehchhuh an tum a, Pu Zoramthanga sorkarin a beih lêtna kha a ropui," a ti a; Mizoram sorkarin raltlante a tuamhlâwm chuan Mizo hnam tana ding ngam sorkar a nih­zia a tilang niin a sawi.

MNF Adviser chuan Assam Rifles sawn chhuah chungchang sawiin, "AR sawn chhuak tur hian MNF lo tu nge bei ve reng reng ni? Kan duh angin an la chhuak zo lo mai a ni. A nawrtu leh sawn chhuak tura kutthlak awm chhun kan nih vangin sawi ngam ber tur pawh kan ni," a ti bawk.