AICC hotute'n an sorkar chuan UCC leh FCAB an ṭhiat dawn tih an sawi

All India Congress Committee (AICC) hruaitu Mizorama chám mekte chuan sorkar laipuiah Congress an sorkar chuan Forest (Conservation) Amendment Bill, 2023 pawm tawh leh Uniform Civil Code (UCC) chu an ṭhiat dawn tih an sawi.

AICC-a Mizoram enkawltu Bhakta Charan Das, observer Sachin Rao leh thupuangtu Mathew Antony-te chuan nimin khan Central YMA office-ah CYMA hruaitute an kâwm a; Forest (Conservation) Amend­ment Bill, 2023 chu hnam tlem zawk leh Hindu ni lo, sakhaw dangte tan a him loh avangin sorkar laipuiah Congress an sorkar chuan an ṭhiat dawn tih an sawi a ni.

AICC hruaitute chuan, UCC chu sakhaw tlem zawkte tana him lo, innêkchêp leh inchîmral tumna a nih thu sawiin, "Inrîkrâpna leh râwvâ taka sakhaw dang vuantute nghaisak hi Congress party chuan a din tirh aṭangin a do tlat a, tihreh a tum a ni. Sakhaw dang nêkchêpna hi state leh central-a Congress a sorkar chuan a tireh tura hma­lakna hmasa tur zinga mi a ni," an ti.

Forest (Conservation) Amendment Bill, 2023 chu ram neitute tan a him lo tih sawiin, "Mahni ramah pawh thunei thei loa awm chu mihring dikna leh chanvo palzûtna nasa tak a ni a, kalpui chi a ni lo," an ti bawk.