Meri Maati, Mera Desh hun hmang

India ramin zalenna a hmuh kum 75-na champha lawmna Azadi Ka Amrit Mahotsav khârna, Meri Maati, Mera Desh (ka leilung, ka ram) campaign chu nimin khan Secretariat tualzawlah hman a ni a, minister Lalruatkima'n a hmanpui.

Lalruatkima chuan, Meri Maati, Mera Desh campaign chu hlawhtling takin Mizoramah kalpui a nih thu sawiin, "Mi dangte ruala ke pên zel a, Mizoram leh Mizo ang pawha mi dangte hnunga kal bik loa hmasawn kan tum a ngai. Mizoram lo ram dang kan neih loh avangin venhim leh tihhmasawn hi kan zavaia mawhphurhna a ni," a ti.

Minister chuan, sorkar hmalaknate theihtawpa thláwp chhunzawm zel tur leh ram hruaite pawh thláwp turin Mizoram mipui a sáwm a; a ṭulnaah chuan khak a, khalh ngil a, an tan ṭawngṭai ṭhin turin mipui a ngen bawk.

Inkhawm hi chief secretary Dr Renu Sharma-i'n a kaihruai a, "Sorkar laipui hmalaknate ṭha takin Mizoram chuan a thláwp ṭhin a, Har Ghar Tiranga campaign pawh Mizoramah a hlawhtling hle a ni," a ti.

Meri Maati, Mera Desh hmannaah hian Sports & Youth Services secretary Dr Lalrozama kaihhruaiin campaign puala thutiam, Paanch Pran chhiar rual a ni a, mi huaisen, pasalṭha leh zalenna sualtute chawimawina hun hman a ni. Zalenna sualtute hriatrengna lungphun hawn a ni bawk.

Meri Maati, Mera Desh hi August 9, 2023 aṭangin Mizoramah kalpui a ni a, khawpui bakah, thingtlangahte kalpui a ni. Sports & Youth Services department chu nodal department a ni a; campaign chhungin zalenna sualtute leh ram tana nunna hlantute zawn chhuah te, an puala hun buatsaih te, hriatrengna lung phun te, thing 75 phuntein hun hman a ni.