KHAWTHLIR

YMA-in thisen pe

YMA, Kolasib Vengthar Branch chuan nimin khan an veng community hall-ah thisen pek an huaihawt a, Kolasib District Hospital tan thisen unit 22 pein, petute mipa 18 leh hmeichhia pali an ni.

Kuhva rah man

Hachhek biala kuhva chíngtute chuan nimin chhun dar 1 vel khan Bunghmun dái, Taitesena thlànmual bulah pick-up truck pahnih aṭangin dan loa Myanmar aṭanga lak luh nia hriat kuhva rah ip 60 an man. Kuhva rahte chu a hnu deuhah kângin, a kâng ral vek a, lirthei leh a khalhtute erawh an him thung.

Website hawng

Guwahati High Court judge Justice Marli Vankung chuan nimin khan Champhai District Court website https://champhai.dcourts.gov.i... chu online kaltlangin a hawng. Website-ah hian Champhai District Court-a thubuai awm dan zawng zawng en theih a nih thu tarlan a ni.

SVEEP campaign

Hnahthial College auditorium-ah nimin khan Systematic Voters’ Education & Electoral Participation (SVEEP) hnuaiah Special Campaign on Special Summary Revision 2023 neih a ni a, Hnahthial District SVEEP nodal officer K Ngosai-i'n a hmanpui. Electronic voting machine a taka hman chhinna hun hman a ni a, zirlaite vote thlaktir chhin an ni.

Lei tlahniam tlawh

Disaster Management & Rehabilitation secretary K Lalrinzuali chuan nimin zing khan Siahaa New Colony leh College Vaiha lei chêt ṭhinna hmun a enfiah a, nimin chhun khan Lawngtlai-III leh Lawngtlai Electric Venga lei tlakhniamna hmunte a tlawh bawk. DMR hotute leh khawtlang hruaitute'n lei tlahniam vanga tuartute chhawmdawlnaa hmalak zel dan tur leh chhiatna a thlen zel lohna atana hmalak dan turte an sawiho a ni.

Raltlan ṭanpui

Zoram Entu Pawl leh Catholic Relief Services-te chuan nimin khan Champhai Zion Veng community hall-ah Manipur leh Myanmar aṭanga Mizorama raltlante hnenah ṭanpuina chi hrang hrang an hlan. Champhai district-ah hian ráltlân Myanmar aṭangin mi 12,000 leh Manipur aṭangin mi 400 vel an awm mek a ni.

Investigation Team din duh

PC party chuan thuchhuah siamin, Lalremruata (11), Mamit thihnaa mawhphurtu chhuichhuak turin special investigation team din an duh thu an tarlang a, "Ni nga a bo hnua August 23, 2023-a a ruang saruaka hmuh tàk hi mihring kut tuar ngeia boral a nih a rinawm hle a, ngawih bopui mai turah kan ngai lo. A bo dan leh thih danah vawiin thlenga mawhphurtute chhui chhuah an la ni lo hi mak kan ti hle a ni," an ti.