Chief Minister nena an inkawm hnuah sorkar hnathawkte'n nawrh an ṭhulh

Sorkar hnathawk páwl hrang hrang intèl khawmna, Federation of Mizoram Government Employee & Workers (FMGEW) bultuma Mizoram sorkar hnathawkte'n vawiin August 28 aṭanga nawrh an tum chu August 26, Inrinnia FMGEW hruaitute leh chief minister Zoramthanga te an inkawm hnuah ṭhulh a ni. Sorkar hnathawkte DA 4%-in tihpun a ni dawn.

August 22, 2023-a FMGEW General Council ṭhukhawmin an rêl dan chuan, sorkar notification anga dearness allowance (DA) pe tura sorkar kar nan August 28-30, 2023 chhung pen/tool down strike kalpui tur a ni a; hna an thawhna hmunah kal tho siin, hna thawh an tum lo.

Pen/tool down strike an neih chhungin sorkar aṭanga thu lawmawm an hmu lo a nih chuan August 31 leh September 1, 2023-ah mass casual leave (a huhoa chawlh) lâk an an tum a; mass casual leave-in awmzia a neih loh zel chuan an kal zel dan tur September 3, 2023-ah rêl an tum a ni.

Chief minister Zoramthanga chuan August 26 khan a pisaah FMGEW hruaitute a kâwm a, an thil phût leh nawrh an tum chungchang a sawipui. CM nen an inkawm zawhah FMGEW hruaitute chu an ṭhukhawm a, nawrh an tum chu ṭhulh an rél a ni.

FMGEW chuan hriattirna tichhuakin, "Sorkar dan ding lai anga DA tipung tura kan ngenna chu Chief Minister zahawm tak Pu Zoramthanga chuan sorkar sum dinhmun harsa tak chungin tun dinhmunah 4% w.e.f 1.9.2023 GPF-a impound turin tihpun min phalsak avang leh a bâk pawh sum dinhmun en chungin la sawiho zel ni se a tih avangin DA tihpun nawrna atana ruahmanna kan neih tawh chu ṭhulh ni se kan ti ta a ni," an ti.

FMGEW tarlan ang chuan, Mizoram sorkar hnathawkte DA chu September 1, 2023 aṭangin 4%-in tihpun a ni dawn a ni.