Mamit naupang thattu a inpuang

August 18, 2023 aṭanga chin hriat loa a bo hnua August 23, 2023 chhûna thia hmuh, Lalremruata (11) s/o Lalvulmawii, Mamit Chhim­veng thattu chu August 25 tlai khan a inpuang.

Vanglaini thu dawn danin, Lalremruata thattu hi R Lalrinchhana (21), Mamit High School Veng a ni a; Police hmaaa a inpuan dan chuan, naupang Lalremruata nen hian Mamit Chhimvenga workshop-ah an riak dûn a, August 17, 2023 zan khan a zu ruiin a rêk hlum a, a tûk August 18 zan dar 11 velah ruang an hmuh tâkna hmun Mamit khelmual bulah a dah.

R Lalrinchhana hian ruang saruaka a awm chhan chu, thawmhnaw ha loa ruang a dah chuan miin Lalremruata a ni tih an hriat chhuah theih loh a beisei vang a ni.

Lalremruata thih thuah hian Mamit police-te chuan mi eng emaw zat thu an zawtfiah a, R Lalrinchhana leh mi dang pakhat chu rinhlelh an kài bik avangin darkar 72 chhung kawl phalna court-ah an dil a ni.

Court phal angin an kawl zui a, thu zawhfiah an nih hnuah R Lalrinchhana chuan August 25, 2023 tlai khan Lalremruata thattu a nih thu a puang a; Central Jail, Aizawla dah turin August 25 zan khan hruai nghal a ni.

Tarlan tawh angin, Lalrem­ruata hi Mamit Chhim­veng YMA-in hun eng emaw chen an zawn hnuah, YMA, Mamit Sub-Headquarters kaih­hruaina hnuaiah zawn a ni a, August 23 chhun khan Mamit khelmual bul kawng chhakah thiin hmuh a ni a, saruaka a awm bakah chháwlin khuh a ni.