Lunglei-Tlabung inkar kawng chhia hnatlangpuiin thawm ṭhat tum a ni

YMA, Khawthlangtuipui Group hnuaia Monitoring Committee, Tlabung VC leh Tlabung Zodin VC huaihawta August 26, Inrinnia páwl hrang hrang 10 chuang aiawh kal khawmte chuan, Lunglei leh Tlabung inkar kawng NH-302 chhe zual laite chu naktuk August 29 hian hnatlangpui koa thawm ṭhat an rél.

Ṭhutkhawma tarlan danin, NH-302 chu damlohna thil leh rîkrum thilah pawh zawh ngam loh khawpa chhia a ni a; a chhiat em avangin lirthei veivâk a tlem bakah, tlan awmchhunte pawhin loh theih loh vangin chuan man (fare) an tisang a, mipuiin harsatna lian tak an tawh phah a ni.

Kawngpui chhia chungchang chu vawi tam au chhuahpui tawh ṭhin mah se, awmzia a nei tak tak loa an hriat thu sawiin, "Tun hnaiah kawng chhia vang nia puh theih thihna ṭum hnih a thleng a ni," an ti.

Kawng chhe zual lai thawm ṭha tura mipui hnatlàn chu tun dinhmuna an harsatna chinfelna tur awmchhun nia an hriat tak avangin, hnatlangpui koha hmalak an rawt a, lungrual takin an pawm ta tih an tarlang.

Vanglaini thu dawn danin, Lunglei aṭanga Tlabung panna kawngpui NH-302 hi kum 2021 tàwp lama sial ṭan a ni a, hun tiam chhunga zawh hman a ni lo. Kum hnih vel a liam hnuah pawh hna thawh tur aṭanga 17% vel chauh an la thawk a ni.

Kawngpui tur lei laih tawhte chu a nihna ang anga kalsan zel a nih ṭhin avangin ṭhál laiin tlân hleih theih loh khawpin a khû a, fûr laiin kal hleih theih loh khawpin a diak ṭhin bawk tih an tarlang.