MNF sorkarin harsatna a tawhte mipuiin an hriatthiampui beisei

MNF Media & Publicity department hotute chuan, MNF kaihhruai sorkarin hun harsa chi hrang hrang a tawn avangin mipui beisei an phâk lohna tam tak a awm an rin thu leh, chu'ngte chu mipuiin an hriatthiampui ngei an beisei a, chuti chung chuan an sorkar leh ngei an rin thu an sawi.

MNF Media & Publi­city hotute hian August 26, Inrinni khan Aizawl Press Club-ah thuthar thehdarhtute an kâwm a; general secretary VL Krosshnehzova chuan, MNF sorkar chhunga hun khirh leh harsa an tawh hrang hrangte a tarlang a ni.

VL Krosshnehzova chuan, MNF sorkar chhunga harsatna an tawh hrang hrangte avangin mipui beisei ang an phâk lohna tam tak a awm an ring thu sawiin, "Harsatna hi a taka kan tawhho vek a nih avangin mipuite'n thûk takin min hriat­thiamsak ngei kan ring tlat a, tih dik loh leh tih fuh tâwk loh tam tak kan neih ngei kan ring. Hun ṭha min siamsak leh ngei turin mipui kan ngen a, mipui duhsakna hmangin kan sorkar chhunz­awm leh ngei kan ringin kan beisei tlat a ni," a ti.

MNF Media tarlan danin, kum 2018 tàwp lama MNF-in sorkarna a chelh aṭangin Chief Minister, minister leh MLA-te'n theihtawp chhuahin, an chanvo ṭheuh an bung nghal a, an thâ tichak turin SEDP board 14 din a ni. Sorkar hmasain a hnutchhiah sum eng emaw zat chu hmun hrang hranga kawng chhiate thawm ṭhat nen leh ṭul hmasa nia hriatahte hman a ni.

Hna thawkin an bung ṭan chauh a, hna thawhna tur project-te sorkar laipuiah ṭhahnem tak thlen hman ni mah se, hripuiin khawvel a nuai zui tih sawiin Krosshnehzova chuan, "Hnathawh chu sawi loh, kawng awm ang ang hmanga dam khawchhuah kan tum tawp a ni," a ti a; Covid-19 vanga Mizoramin sorkar laipui a ṭanga sum a hmuh tur cheng vbc. 2,632.58 a hmuh loh thu a sawi.

RTI Act tlawhchhana zawhna Finance depart_ment-in an chhanna an tarlan danin, sorkar laipui aṭanga sum hmuh tur, Covid-19 léng vanga hmuh tâk lohte chu - sorkar kum 2019-20 chhungin Share of Taxes-ah cheng vbc. 867.39, kum 2020-21 khan Share of Taxes-ah vbc. 1,093.73, kum 2021-22 chhunga thla thum (April-June) chhungin Share of Taxes-ah vbc. 125.46 leh 15th Finance Commission Special Grants vbc. 546 a ni.

VL Krosshnehzova chuan, Covid-19 hripui dona atan sorkar laipui aṭangin cheng vbc. 70 vel hmuh a nih thu sawiin, "Hmanna tur ruahman sa, ruahman a nihna baka hman theih lohte a ni," a ti.

Covid dona atan CM Relief Fund-ah Rs 31,37,73,096 a luh thu te, ruahman lâwknaa awm lo raltlan puihna, G20/B20 thlenna, International Tourism Mart 2022 thlenna leh a dangte a awm thu a sawi a ni.

International Tou­rism Mart thlenna atan cheng nuai 1,463.25 hman a nih thu a sawi chung­changah zawhna chhangin Krosshnehzova chuan, "Mizoram sorkar sum hman a ni a, central aṭanga hmuh lêt turte tun thlengin hmuh a la ni lo," a ti a; ráltlân puihna sum hman tawhah pawh central aṭangin nuai 300 bâk hmuh lêt a awm rih loh thu a sawi.

MNF Media & Publi­city hotute chuan, hripui léng, khawchhak lama lìrnghîng, chhim lama nasa taka ram kâng, vawk pûl, ramria buaina leh a kaihnnawih thil, Myan­mar, Bangledesh leh Manipur aṭanga ráltlânte buai­puina atan ruahman lawknaa awm lo sum tam tak hman a nih thu a sawi a; "Hriat lâwk loh harsatna naménloin min tlâkbuak karah a remchan ang anga theihtawp chhuah a, kan sorkar hmalakna tam tak a awm thei hi a lawmawm kan ti em em a ni," a ti.