Transport dept.-in lirthei 2,93,448 an ziak lut tawh

Mizoram sorkara Transport department chuan August 20, 2023 thleng khan driving licence 4,84,279 an pe chhuak tawh a, lirthei 2,93,448 an ziak lut (register) tawh.

Transport minister TJ Lalnuntluanga'n August 24, 2023-a Aizawl Press Club-a press conference a neiha tarlan danin, Transport department-in lirthei a ziah luh tawh zinga tam ber chu two wheeler niin, 1,99,886 a ni a, lirthei ziah luh tawh zawng zawng aṭangin 68.12% a tling. A dawttu chu car niin, 49,490 a ni a, lirthei ziah luh tawh zat aṭangin 16.86% a ni.

Sumdawnna lirthei zingah bungraw phur chi 21,441 ziah luh a ni tawh a, motor cab (taxi) 5,818, three wheeler (auto-rickshaw) 5,809, two wheeler taxi/rental 3,327, maxicab 2,395 leh bus 592 ziah luh a ni tawh.

Transport department-in driving licence a pek chhuah tawh 4,84,279 zinga tam ber chu LMV driving licence niin, a zatve aia tam 2,74,407 a ni a, 56.66% a tling.

A dawttu chu two wheeler driving licence niin, 1,73,153 a ni a, pathumna chu transport/commercial licence niin, 31,750 a ni.

Driving licence pek tawh zinga a zatve tling lo deuh 2,30,210 (47.54%) chu Aizawl District Transport Officer (Urban) aṭanga pek chhuah a ni a, pek chhuah tlemna ber DTO - Aizawl (Rural) aṭangin licence 5,958 pek chhuah a ni tawh.

Hetih lai hian, Aizawl DTO (Rural) hi July 21, 2020 khan tihtawp a ni tawh a, Aizawl DTO (Rural)-a lirthei ziah luh (register) tawhte pawh a neitute'n an duh a nih chuan Aizawl DTO (Urban) hnuaiah ziah luh theih a ni a, 09 chu 01-ah thlâk theih a ni.

Driving licence lam kaih­­­hnawih software hman Sarathi 2.0 chu March 25, 2019 aṭangin version sang zawk, Sarathi 4.0 hman a ni tawh a; Sarathi Class of Vehicle (COV) thar pawh October 8, 2020 khan hman ṭan a ni.

COV thar hnuaiah hian LMV-a class hrang hrang awm ṭhin - LMV (GV), LMV (Cab), LMV-3, adt. tihte chu LMV tih tawpin khaikhawm a ni a; lirthei leh two wheeler khalh theih­na licence-te pawh siam rem mek a ni bawk.