Mizoram sorkarin PM scheme-te mipui a hriat chiantir duh lo - John Barla

Sorkar laipuia Minority Affairs minister of state John Barla chuan, Mizoram sorkarin PM scheme hrang hrangte mipui a hriat chiantir duh loh bakah, hma a la ṭha duh lo niin a sawi a; mi rethei zawkte hamṭhatna tur sorkar laipui scheme-te ṭha taka kalpui thei tur state sorkar Mizorama a awm a ṭul thu a sawi bawk.

John Barla hian August 26, Inrinni tlai khan Aizawla BJP, Mizoram Pradesh pisaah thu sawiin, sorkar laipuiin Prime Minister scheme hrang hrang a siamte chu mi retheite'n a nihna anga an chhawr theih nan mipui hrilhfiah a ngaih thu a sawi a, "State sorkarin heng PM scheme-te hi a nihna anga hre thei lo tur leh mi retheite'n hamṭhatna an dawn theihna turte mipui an hrilhfiah duh loh bakah, hma an laksak ṭhat duh loh avangin mi retheite'n nasa takin an tuar a ni," a ti.

Mizoram sorkarin mipui hamṭhatna aia anmahni hlâwkna an ngaihtuah ṭhin avangin mipuiin an retheih phah tih sawiin John Barla chuan, "Kumin MLA inthlan awm turah hian mi retheite tana hamṭhatna hrang hrang neitu, mipui sorkar BJP ngei hi lo thlang u la, Mizoramah hma­sawnna a takin kan hmu ngei dawn a ni," a ti a; Mizoramah BJP sorkartir turin mipui a ngen.

Union Minister chuan, mi zawng zawngin an chanvo an chan theih nan BJP-in hma an la tih sawiin, "Pu Modi chuan mi retheite tan scheme ṭha tak tak a buatsaih a, chu'ng scheme-te chu a taka an chhawr theihna tur chuan PM scheme-te a nihna anga hmang thei tur Mizoramah sorkar a din a ngai a ni," a ti.

BJP leh Kristianna chungchang sawiin John Barla chuan, "BJP hi Kris­tianna nen a inmil lo anga an sawi hi a tak ni se, kei Kristian pa ai hian Hindu pa tam tak minister-ah an dah ngei ang," a ti a; BJP chuan Kristian state-te tan malsawmna a thlen zawk ṭhin niin a sawi bawk.