KHAWTHLIR

Lei tlahniam enfiah

Disaster Management & Rehabilitation secretary K Lalrinzuali chuan August 26, Inrinni khan tun hnaia Zobawk South leh Zotlang Tourist Lodge panna kawnga lei tlahniamte a enfiah a; harsatna lian a thlen loh nan kawng siamtu NHIDCL leh EPC contractor-te chu chak taka hma la tura nawr a tum thu leh, lei minna zâwna awm chhungkaw pali riak chhuakte chu a theih ang anga chhawmdâwl an nih tur thu a sawi.

Dan loa lâk luh man

Assam Rifles sipaite chuan August 26, Inrinni khan Zokhawthar leh Mélbûk inkarah ram dang aṭanga lak luh meizial báwmpui pali, beer báwm 124, wine bawm pasarih leh sapzu báwm paruk an man a, a vaiin Rs 10,12,400 hû a ni. An thil mante hi Champhaia Customs hnenah an hlan.

Hriselna huang

Jerry Lalduhzuala ziah, 'Hriselna huang' tih lehkhabu chu August 26, Inrinni khan Social Welfare & Tribal Affairs minister Lalrinawma'n Tourist Lodge, Chaltlangah a tlangzarh. Lehkhabu hi Dr RK Lalrosiama (L) hriatrengna atana ziah a ni a, Rs 250 man a ni.

Generator pe

AMC Ward-XV bialtu councillor Zodingpuii chuan August 26, Inrinni zing khan a bial chhunga Bungkawn Vengthar YMA leh Badminton Club hman tur generator (watt 3,500) a pe.

Kuhva rah man

August 25, Zirtawpni zan khan Hachhek bial kuhva chíngtu duty-te chuan Tumpanglui, Mamit district-ah 407 truck MZ-04 0950 aṭangin Myanmar aṭanga dan loa lak luh nia hriat kuhva rah ip 25 an man. Kuhva rah an mante chu a hnu deuhah a kâng ral vek a ni.

Rozgar Mela

Assam Rifles chuan vawiin hian Aizawla 2nd AR Gajraj Hall-ah Rozgar Mela (Job Fair) vawi 8-na an buatsaih dawn a, sorkar laipuia Minority Affairs minister of state John Barla-a'n a hmanpui ang. Rozgar Mela hi sorkar laipui ruahman angin vawiin hian state 25-a hmun 44-ah huaihawt a ni dawn a; Prime Minister-in online kaltlangin ṭhalai hna hmu tharte hnenah appointment letter a pe dawn a, appointment letter pek tur mi 70,000 vel an awm.

Minister-in hmanpui

Sports & Youth Services minister Robert Romawia Royte chuan August 26, Inrinni khan Zawlnuam Zone Football Association buatsaih foot­ball tournament khàrna inkhawm a hmanpui. Minister chuan, Hachhek bialah Mizoram sorkarin infiamna hmunhma leh bungrua tam tak a siam thu leh an bial chu infiamna hmunhma nei ṭha ber ni turin ṭan lak a nih dawn thu a sawi.

Lungphùm phúm

Kolasib bawrhsap John LT Sanga chuan August 26, Inrinni khan Kolasib College Vengah Local Administration department hmalakna hnuaia semi indoor stadium volleyball court sakna tur lungphùm a phúm. Volleyball court siam tur chu metre 26-a sei, metre 17-a zau a ni dawn a, cheng nuai 28 hmangin kumina siam zawh tur a ni.