Truck neitute leh sorkar an inrem; Mamit dist-a kawng dan tihtawp a ni

Mamit Truck Owners' Association (MTOA)-in Mamit district-a kawng leh lei (bridge) chhia siam phûta August 21, 2023 aṭanga Mamit district-a kawngpui hrang hrang an dan chu Mizoram sorkar nen inremna an siam hnuah August 26, Inrinni tlai dar 4:50 khan an titàwp.

Inremna thuthlungah hian Mizoram sorkar aiawhin PWD (Highway) chief engineer Vanlalmuana'n hming a ziak a; Mamit additional DC V Laldinsanga, All Commercial Vehicle Mamit President leh Mamit Sub-Headquarter YMA President ten hming an ziak bawk.

MTOA LEH SORKAR (PWD) INREMNA

▶ Darlak bailey bridge thawmṭhatna tur NH Division I-in estimate an siam hi August 2023 chhung ngei hian sorkarah thehluh a ni ang. Estimate hi sanction a nih hmain PWD-in bridge part hrang hrang a neih sate a la khawm ang a, phai lama chah ngaite chu estimate sanction a nih veleh a chah nghal bawk ang.

▶ Ṭhál tui a tlem a, diversion road siam theih a nih hunah bailey bridge strengthening/dawh ṭhat hna thawh ṭan nghal a ni ang.

▶ NH-44A project balance work estimate siam mek hi September 2023 thla chawhma chhung ngeia siam zawh a, sanction turin sorkar laipuia Ministry of Road, Transport & Highway-ah thehluh tum a ni ang.

▶ Ministry-in a sanction ve leh tender chhuahin a thawktu tur thlan a ni ang.

▶ Darlak-Tuidam concrete pavement-a motor tlan dan tur ruahmanna siam turin he mi lama thuneitute ngen a ni ang.

▶ Mamit-Bairabi kawng hi awlsam zawka lirthei kal theih nan August 2023 chhung hian a chhe zual lai thawm ṭhat hna thawh ṭan a ni ang.

▶ Dampui kawng lei min kumhlun lai hi lirthei tlân theih turin a ṭul anga thenfai a ni ang.