Lirthei táng enkawltute endik zo Mi 44-in Covid-19 an vei tih finfiah

Kolasib district-a NH-54 kawngpui chhia leh siam mek vanga lirthei tangkhang khalhtu (driver) leh puitu (handyman)-te bakah, a bul hnaia mite'n Covid-19 hripui an vei leh vei loh Rapid Antigen Test (RAT) hmanga endik hna zawh a ni tawh a, an zingah Covid-19 vei mi 44 hmuh chhuah a ni. Hmawngkhawthlir leh Seṭhawn inkar - containment zone a nihna chu nimin tlai dar 6 khan hlih a ni a; Vairengte checkgate paltlang tur lirtheite chu RAT hmanga endik zel a ni tawh dawn. 

NH-54 kawngpuia lirthei tangkhang enkawltu mi 500 chuang chu Covid-19 an vei leh vei loh RAT hmangin endik a ni a, lirthei enkawltu mi 43 leh lirthei tangkhanna hmun bul hnaia naupang kum 12 miin hripui an vei tih hmuh a ni. Rapid Antigen Test hmanga endik hi August 7, 2020 zanah ṭan a ni a, nimin zing dar 4 khan zawh a ni. August 7 zan leh August 8 zingah driver/handyman mi 18 leh Seṭhawn mipa naupang kum 12 miin Covid-19 an vei tih hmuh chhuah a ni a, Inrinni leh Pathianniah mi 25 hmuh chhuah leh a ni bawk.

Seṭhawn leh a chhehvel tual­chhung mi 200 dáwn endik zingah mipa naupang kum 12 mi bak chu hripui vei hmuh belh a ni lo a, hei vang hian community spread a awm loah district thuneitute chuan an ngai. Covid-19 positive kaih­hnawihah lirthei 39 hrên a ni. Vanglaini palai zawhna chhangin Kolasib DC Dr H Lalthlangliana chuan, endik hna zawh a nih tawh avangin Hmawngkhawthlir leh Seṭhawn inkar containment zone atana a puan chu nimin tlai dar 6 khan sût a nih thu a sawi a, "Kawng siam mek a nih avanga Bualpui leh Thingdawl inkarah lirthei tlân hun siam tawh chu hman chhunzawm tur a ni," a ti.

Bualpui leh Thingdawl inkar hi zan lamah chuan hawn a ni a, chhûn lamah chuan chhun dar 12:00-1:00 inkarah chauh tlan phal a ni.

Kolasib District Magistrate chuan nimin khan thupek chhuahin, nimin aṭang khan Vairengte checkgate paltlang tur lirthei khalh­tute leh a chuang zawng zawngte chu Mizoram an luh hma ngeiin Rapid Antigen Test hmanga endik hmasak ngei ngei tur a nih thu a puang a, "Test paltlanga negative-te chauh lo chuan checkgate an paltlang thei lo ang," a ti.

.    Vairengte checkgate aṭanga Mizorama lirthei lut tur driver, handyman leh passenger (civil & army) zawng zawng Vairengte Medical Screening Point-ah Rapid Antigen Test hmanga endik vek tur.

.    Bairabi leh Saiphai lamah bungrua leh passenger phur lirthei kaltlang phal a ni lo.

.    Endik tawhte chuan endik an ni tawh tih chhinchhiahna sticker/banner, checkgate-a authority-te'n an pek an lirtheiah an tár ngei tur a ni.

.    Covid-19 positive leh a kaihhnawih vanga lirthei tihkhawtlai (detain)-te chu lirthei neitute'n a rang thei ang bera lak sawn dan an ngaihtuah tur a ni. Lirtheite chu phuh thianghlim hnuah lak sawn phal a ni ang. Lak sawn dan tur chu Vairengte police (SDPO/OC)-te be pawpin ruahmanna an siam ṭhin ang.

.    Rapid Antigen Test aṭanga positive an awm chuan Covid Care Centre thlenga dah luhnaah CMO kaihhruainain medical officer in-charge, Vairengte-in mawh a phur. Hemi atan hian a bika ruahman lirthei (dedicated vehicle) district administration-in a ngaihtuah ang.

.    Test-a negative-te chu mahni inah ni 14 chhung self monito­ring-a enkawl zui tur an ni a, ni 14 chhungin páwna chhuah phal a ni lo. Inenkawl zuiin harsatna a neih chuan Kolasib CMO hriattir tur a ni. Self monitoring-hi an kengkawh ṭha em tih an awmna hmuna task force/YMA hruaitute'n an lo vil chhunzawm tur a ni.