Mizoramin NEIGRIHMS a mamawh - Dr R Lalthangliana

Health & Family Welfare minister Dr R Lalthangliana chuan August 26, Inrinni khan North East Indira Gandhi Regional Institute of Health & Medical Science (NEIGRIHMS), Shillong a tlawh a; hotute nen an inkawmnaah, Zoram Medical College tihchangtlun leh tihphuisuina atan Mizoramin NEIGRIHMS thiamna a mamawh thu a sawi.

HFW Minister hian NEIGRIHMS director Prof. Dr Nalin Mehta, medical superintendent Prof. Dr C Daniala leh thawktu dangte a kâwm a; ZMC-a Cardiology department bul ṭanna atan cheng nuai 100 hmuh a nih thu sawiin, ZMC-a din tur Cardiology department-a thawk tur doctor, nurse leh technician-te tan a thlawna training tihsak turin a ngen a ni.

ZMC-a department hrang hrangte tihchangtlun leh tihphuisui nan NEIGRIHMS thiamna Mizoramin a mamawh thu sawiin R Lalthangliana chuan, "A bikin training tâwi ang chi kan mamawh," a ti a; Mizoram aṭanga NEIGRIHMS pantu damlo tam zawk chu mi harsa tak tak an nih ṭhin avangin ngaihsak leh zual turin a ngen.

Health Minister chuan, Mizoramin a neih loh - neurology leh nephrology lama natna nei, NEIGRIHMS-a inentir tura kalte'n enkawlna ṭha an dawn ṭhin avang leh doctor-te'n an lo ngaihsak ṭhin avangin a lawm thu a sawi bawk.

NEIGRIHMS director Prof. Dr Nalin Mehta chuan, Dr R Lalthangliana ngennate chu a theih anga bawhzui a, hma a lo lak tur thu leh training chungchangah thawhho dan kawng an dap tur thu a sawi.

Health Minister hi Shillong Mizoram House deputy resident commissioner Lalchhanhima leh Guwahati Mizoram House deputy resident commissioner Dr Malsawmtlunga Fanchun ten an ṭawiawm a ni.