Covid-19 vei tawh zat 620 Niminah mi 25 an chhuak

Nimina Thawhṭannia chhuak Vanglaini-in a tarlan hman loh chinah August 9, Pathianni khan Covid-19 hripui vei mi paruk hmuh chhuah a ni a, Mizorama hripui vei hmuh tawh zawng zawng chu mi 620 an ni. Hetih lai hian, hripui zinga dam tawh mi 25 chu nimin khan enkawlna hmun aṭangin an chhuak.

Covid-19 vei enkawl zinga BSF sipai 20-te chu nimin chawhnu khan Covid Care Centre (CCC), Tribal Art Centre, Aizawl aṭangin chhuahtir an ni a; nimin vêk khan Zobawk CCC aṭangin BSF sipai panga chhuahtir an ni bawk. 

Nimin tlai thleng khan Mizorama Co­vid-19 vei hmuh chhuah tawh mi 620 zinga 323 (52.10%) chu chhuahtir an ni tawh a, mi 297 (47.90%) an la chhuak lo. La chhuahtir loh zing­ah hian endik nawnnaa hripui vei tawh lo (negative tawh) tih finfiah eng emaw zat an awm.

Pathianni khan ZMC laboratory-a mi 55-te swab sample endik zingah Covid-19 vei hmuh chhuah thar an awm lo. Rapid Antigen Test hmanga district pathuma mi 193 (mipa 170 leh hmeichhia 23) endiknaah hripui vei mi pasarih hmuh chhuah an ni.

Rapid Antigen Test hmanga hmuh chhuah pasarih zinga pakhat - Health department-a driver, Mizoram chhung­a mi dang aṭanga kai (positive contact) chungchang bik chu nimina chhuak Vanglaini-ah tarlan a ni tawh. Tarlan hman loh mi parukte chu Kolasib district-a awm mi pali leh, Aizawl leh Champhai district-a mi pakhat ve ve a ni.

Kolasib district-a RAT hmanga Covid-19 vei hmuh thar mi palite chu truck driver leh handyman, hnam dang mipa vek an ni a; kum 22-43 inkar, Assam, Tripura leh Uttar Pradesh mite niin, harsatna (Covid-19 symptom) an nei lo.

Champhai district-a hripui vei hmuh chhuah chu hmeichhia kum 40-a upa, Manipur aṭanga Mizorama lut a ni a, Aizawl district-a hmuh chhuah thar pakhat pawh mipa, Myanmar aṭanga rawh luh a ni bawk a; an pahnih hian Covid-19 symptom an nei lo ve ve.

August 8-a hmuh chhuah dang, Lunglei Civil Hospital (LCH) laboratory-a BSF sipai panga leh Aizawla Health department dri­ver pakhatte erawh chu nimin khan Vanglaini-ah tarlan a ni tawh.