Inthlana chuh tur YMA OB-te inhnûkdâwk hmasa turin chah

Central YMA chuan nimin khan thuchhuah siamin, hmun hrang hranga YMA hruaitu, office bearer-te August 27, 2020-a village council leh local council inthlana chuh (candidate) turte chu YMA dan angin, nomination paper an thehluh hmain YMA-a an nihna aṭanga inhnûkdâwk hmasa turin a chah.

CYMA chuan, "YMA Dan Bu bung-IV chang 25(a)-in, 'Central/sub-headquarters/group/branch YMA office bearer-te chu MLA/MP/MDC/councillor/LC/VC-ah an ding dawn a nih chuan, nomination an file hmain YMA-a an nihna an inhnûkdâwk tur a ni,' a tih angin, VC/LC inthlan lo awm turah Central/sub-headquarters/ group/branch YMA office bearer-te candidate tur an awm a nih chuan, nomination an file hma ngeiin, YMA-a an nihna inhnûkdâwk turin kan inngen a ni," a ti a; CYMA thuchhuak chu zaha zâwm ṭheuh turin an ngen nghal bawk.