Ram pass tihtawp tur 603 hmu tawh Court thu vangin hma la zui thei rih lo

Land Revenue & Settlement (LRS) department chuan Mizo­ram­ah ram pass chi hrang hrang tihtawp (cancel) tur 603 an hmu chhuak tawh a, Gauhati High Court (GHC) thu chhuak vangin titawp tura hmalakna an chhunzawm thei rih lo thung.

RTI Act hmanga zawhna LRS department-in an chhan danin, National Green Tribunal (NGT) Principal Bench chuan March 16, 2020-a Notified Reserve Forest area chhunga ram pass awm zawng zawng titawp vek turin Mizoram sorkar a hriattir a ni. Mahse, thupek chu Gauhati High Court-in January 27, 2021-ah a hnuh kîr (set aside) avang leh court-a thu kal lai a nih avangin ram pass titawp turin hmalak chhun­zawm theih a ni rih lo a ni.

Centre for Environment Protection (CEP)-in thupek khin letna (appeal) an thehluhah January 17, 2023-a High Court order-in RRF notification 21.1.1965 chu a nihna anga kalpui tur (status quo kenkawh tur) a ti a; he thubuai hi court-a thu kal lai (subjudice) a nih avang leh final court order a la awm loh avangin ram pass tihtawp chungchangah hmalak theih a ni rih lo, tih a ni.

March 16, 2020 khan NGT Principal Bench chuan Mizoram sorkar hnenah reserve forest area chhunga LSC, periodic patta, VC pass leh WRC pass pek chhuah chu Forest (Conservation) Act, 1980 kalh a ni, a ti a, ram pass-te chu titawp (cancel) vek turin a hriattir a ni.

NGT Principal Bench thu bawhzuiin LRS Director chuan May 26, 2020 khan district hrang hranga settlement officer-te chu hriattirna a pe nghal a; an huam chhunga reserve forest area-a ram neite chu a rang lama zawng chhuak tur leh cancel a nih theih nan ram neitute hnenah Mizoram (Land Revenue) Act, 2013 tlawhchhana show cause notice (insawifiah tura hriattirna) pe turin a hriattir.

LRS Director-in district hrang hranga settlement officer-te hnenah hriattirna a pekah hian, NGT thupek angin chak taka hma la nghal tur leh hriattirna ngaihthah officer-te chungah dan anga hmalak a nih tur thu a tarlang bawk.

Hmalak tawhna china reserve forest area chhunga pass nei hmuh chhuah tawh chu Kolasib district-ah 418, Aizawl district-ah 78, Lunglei distrcit-ah 26, Champhai district-ah 10, Mamit district-ah 41 leh Lunglei district-ah 30 a ni a, a vaiin 603 a ni.